Verndarar íslenskra náttúruauðlinda

Það varð innvígðum og innmúruðum ljóst á níunda áratugnum að fisknum í sjónum var ekki lengur vært vegna ágengni smábátaeigenda sem sífellt vildu ónáða hann með krókum og öðrum tólum. Íslenskir stjórnmálamenn með háleit markmið fengu því togaraútgerðum það mikilsverða verkefni að vernda fiskinn í sjónum fyrir græðgi trillukarla.

Íslenskir stjórnmálamenn sem eru sérstaklega hugvitsamir létu sér þetta ekki nægja því nú ku nokkrir þeirra vera orðnir vansvefta af áhyggjum af því að íslenskt vatn væri fótum troðið og fóru því að leggja á ráðin um að koma vatninu undir verndarvæng fámenns hóps manna. Manna sem eru sérlega vel gerðir og kunna að fara betur með vatn en aðrir menn. Að því er sumir telja jafnvel að breyta því í gull. 

Vitsmunir íslenskra stjórnmálamanna eru í sífelldri þróun og áhugi þeirra á gullgerðarmönnum fer vart dvínandi. Tekist hefur að grafa upp Kanadískan gullgrafara sem stofnað hefur fyrirtæki sem hægt er að eyða í einu vettvangi með pappírstætara og mun það þá ekki skilja eftir sig önnur vegsummerki en gáttaða íslenska stjórnmálamenn. Þessi gullgrafari er hinn nýi verndari íslenskra orkuauðlinda. 

Heimsk alþýðan er sífellt umhugsunarefni íslenskra stjórnmálamanna. Hvernig stendur á því að sauðsvartur almúginn skilur ekki þessi æðri markmið þeirra?

 

 Jónas.is hefur eftirfarandi um Magma viðskiptin að segja:

 Af hverju gerir ríkisstjórnin ekkert í máli Magma? Málið er eins vitlaust og yfirleitt er unnt. Skúffufyrirtæki frá Kanada eru afhentar auðlindir á Reykjanesskaga framhjá lögum og rétti. Fávísir lagatæknar segja, að það sé bara í lagi. Þær kerlingar ætti að reka strax. Ef ekki vill betur, á ríkið að setja neyðarlög um verndun auðlinda. Alls ekki gengur, að landráðafólk í spilltum ráðuneytum túlki lög svo þröngt, að það gangi þvert á anda laganna. Ríkisstjórnin gerir ekkert, því að í eymd sinni og volæði er hún búin að sætta sig við lögbrotið. Kannski hefur einhver fengið eitthvað undir borði.

Á Svipunni er ágæt grein um yfirgang Alþjóðagjaldeyrissjóðinn

 

 

Undrast ummæli Ögmundar

Athugasemdir

[Axel Þór Kolbeinsson, 14.7.2010 kl. 08:13]

Hægt er að horfa á Flow í fullri lengd hér.  Meira af áhugaverðum heimildamyndum má finna á www.sprword.com

[Viðar Ingvason (IP-tala skráð) 14.7.2010 kl. 10:40]

Stórútgerðarmönnunum Íslensku var svo eftir allt saman ekki treystandi fyrir fiskimiðunum, réttu þau yfir til bankstera í Deutche Bank!

[Árni Gunnarsson, 14.7.2010 kl. 15:44]

Það er stór - undarlegt hvað þessi ríkisstjórn er samtaka við að brjóta öll þau heit sem stjórnarsáttmálinn skýrir okkur frá.

Líf ríkisstjórnarinnar hangir á bláþræði. Það verður útkoman úr vinnu sáttanefndarinnar um fiskveiðistjórnina og síðan nýjasti samningurinn við Breta og Hollendinga um Icesave sem ráða líklega úrslitum.

Og nú er eftir að sjá hvaða útkomu hún fær úr næsta úrskurði dómstóla í gjaldeyristengdu lánunum, bæði bílalána og íbúðarlána.

Það styttist í byltinguna og hún mun verða snarpari en búsáhaldabyltingin. Það er óþarfi að hanga með svona ríkisstjórn árum saman.

[Jakobína Ingunn Ólafsdóttir, 14.7.2010 kl. 20:15]

Já Viðar ég er ekki viss um að þeir hafi verið settir í persónuleikapróf áður en þeim var falið að innheimta skatta af sjávarmiðunum.

Árni ég er að missa trúna á að þessi ríkisstjórn muni nokkurn tíma gera nokkuð af viti.

[Elle_, 15.7.2010 kl. 23:58]

Algerlega sammála pistlinum.  Ríkisstjórnin brýtur lög og mannréttindi.  VG hlýðir og þegir að mestu þó yfir öllum Jóhönnufylkingar-yfirganginum, í EU, Icesave, þar til loksins nú löngu seinna og kannski of seint.  Og Steingrímur J. gerir ALLT sem Jóhönnuliðið heimtar og kúgar með þeim.   Hvílík eymd og skömm.   Það var sko vel ljóst fyrir löngu að Magma ætlaði að ná yfirráðum yfir stærstum hluta Magma, þó þeir hafi logið öðru. 

[Elle_, 16.7.2010 kl. 00:10]

Vil segja að ég meinti ekki að VG í heild væri loksins nú að gera neitt af viti í AGS-, EU- og Icesave-málunum, var bara að meina Magma.  Og of lítið of seint.  Það er ekki nóg að 2 þeirra séu andvíg Icesave.  Nei, VG er jafnsekur flokkur og Samfylkingarófétið sem þeir vinna með í kúguninni gegn landsmönnum.