Hvað þýðir bankahrunið fyrir venjulega Íslendinginn?

Það þarf nú kannski að svara því fyrst hvað er venjulegur Íslendingur. Eru stjórnmálamenn venjulegir Íslendingar? Til dæmis stjórnmálmaður sem hefur verið í forsjá flokks síns og skattgreiðenda frá því að hann lauk skólagöngu. Hvað með Íslendinginn sem fékk 20 milljónir í mánaðarlaun?

Hinn venjulegi Íslendingur fékk á bilinu 150 til 600 þúsund í mánaðarlaun. Hann keypti hús eða íbúð á uppsprengdu verði og skuldsetti sig upp í rjáfur. Stjórnmálamenn sem fengu góða styrki frá byggingaverktökum tóku ákvarðanir sem leiddu til gerviverðs á húsnæðismarkaði. Ríkisstjórn Sjálfstæðisflokks og Framsóknar handfærði upp fasteignamat til þess að auka veðhæfni húsnæðis. Sama ríkisstjórn færði veðmörk upp í 90%. Þá var fyrirkomulagi á úthlutun lóða hagað þannig að því fylgdi lóðabrask. Í kjölfar þessara ákvarðanna hækkuðu fasteignagjöld og vaxtabætur þurrkuðust út hjá mörgum fjölskyldum.

Ríkissjóður græddi, borgarsjóður græddi, byggingarverktakar og lóðarbraskarar græddu en síðast en ekki síst græddu bankarnir sem voru komnir í eigu vildarvina Sjálfstæðisflokks og Framsóknarflokks.

En fyrst að svo margir græddu þá hljóta einhverjir að hafa tapað. Það liggur nefnilega í eðli málsins að þegar að einn græðir þá tapar annar. Jú þeir sem töpuðu voru þeir sem keyptu sér húsnæði á tímabilinu 2003 til 2008. Sérstaklega þeir sem voru að kaupa í fyrsta skipti, þ.e.a.s. unga fólkið.

Þetta ferli hófst ekki óvart. Stjórnmálamenn voru á mála hjá bönkum og bröskurum. Í stað þess að taka ákvarðanir sem voru góðar fyrir „venjulega Íslendinga" tóku þeir ákvarðanir sem voru góðar fyrir óvenjulega Íslendinga, þ.e.a.s. fyrir fólk sem hafði milljónir í mánaðartekjur og fyrir stjórnmálamenn sem þáðu greiða af óvenjulegu Íslendingunum.

Auk þess sem venjulegum Íslendingum er ætlað að greiða gerviverð fyrir húsnæði sitt er þeim ætlað að fjármagna bankanna. Fjármagna banka sem nú þegar eru búnir að hafa af þeim gríðarlegt fjármagn vegna vaxta og verðbóta af lánum. Lánum sem fjármagna gerviverð sem nú er að hjaðna niður í byggingarkostnað án þess þó að skuldir vegna húnæðis hjaðni.

Óvenjulegum Íslendingum er ekki ætlað að bera skaðann. Þýðir þetta að venjulegur Íslendingur er sá sem tapar en óvenjulegur Íslendingur er sá sem græðir?

	Óvissu um framtíð Haga eytt
Ábyrgðarmaður færslu Tenging við þessa frétt hefur verið rofin vegna kvartana.

Athugasemdir

[Ómar Geirsson, 5.2.2010 kl. 09:39]

Blessuð Jakobína.

Mikið sammála þér um orsakir og afleiðingar.  Ég myndi svei mér þá ganga í VG til að styðja þig ef ég væri á suðurhorninu.

En í huga er ég eitt atkvæði, atkvæði gegn heimsku og spillingu.

Kveðja að austan.

[Guðmundur Pétursson, 5.2.2010 kl. 10:16]

Og hverjir ætli séu að græða núna?  Lögfræðingapakkið í skilanefndunum og annað pakk tengt þeim.  Bananalýðveldið Ísland er spilltasta ríki hins vestræna heims og því verður seint breytt.

[Ábótinn (IP-tala skráð) 5.2.2010 kl. 12:42]

Varðandi:"Auk þess sem venjulegum Íslendingum er ætlað að greiða gerviverð fyrir húsnæði sitt er þeim ætlað að fjármagna bankanna" 

Mér heyrist á þér að þig undri þetta 

Áttu virkilega von á því að það verði breyting hér meðan það er sama fólkið lykilstjórnendur í stjórnsýslu og viðskiptalífinu ? Hver "á" t.d. núna, enn og aftur, annað af tveimur skipafélögum sem flytja vörur til landsins núna ?

Taktu smástund í að skoða forsíðu hvítbókarinnar hvitbok.vg og teldu hvað það eru margir þar sem eru ekki enn að. Æði !

Ef eitthvað er óskýrt í þessu þá svona almennt talað sýnist mér sama liðið (elítan - úrvalið - hinir útvöldu - hinir smurðu ) vera að bæði bak við tjöldin og uppi á yfirborðinu. Einhverjum peðum hefur þó verið fórnað, (flutt að öllu eða hluta til) svona rétt til að halda andlitinu. 

En það má ekki gleyma húmornum í þessu öllu, hann er víða   Þetta eru miklir húmoristar, því skal haldið til haga.

Hér er t.d. mjög fyndið "vefsvæði".

Takk annars fyrri frábæra pistla. Margir hafa undanfarið verið kengbeygðir til hlýðni í bloggheimum, en þú stendur upprétt.

[Ábótinn (IP-tala skráð) 5.2.2010 kl. 13:17]

Jónas fv DV ritstjóri og núverandi eftirlaunaþegi með örugg laun hefur annað orðalag á þessu í dag en ég.

Ég birti það hér til gamans  en ljóst má vera að húmornum linnir ekki.

"Við endurreisn banka og stofnun Bankasýslu ríkisins voru enn ráðnir siðblindingjar í æðstu stöður. Siðblindan er enn á fullu"

Bankasýsla ríkisins - minnir á raftækjaverzlun ríkisins.

[Ásdís Sigurðardóttir, 5.2.2010 kl. 14:02]

Þú ert klár, líkar vel við hvernig þú hugsar.

[Hákon Jóhannesson (IP-tala skráð) 5.2.2010 kl. 14:43]

...elítan - úrvalið - hinir útvöldu - hinir smurðu

 Ábótinn er alveg kostulegur, það á að ráða hann umsvifalaust sem pistlahöfund á helstu vefsvæðum landsins til þess að lyfta umræðunni á léttara plan.