Hvað þýðir niðurstaðan

Margir virðast gefa sér að fólk hafi gengið til kosninga um mismunandi hluti. Ég ætla þó að gefa mér að þjóðin sé almennt læs og þjóðin hafi verið að kjósa um Icesave en ekki líf ríkisstjórnarinnar.

það er ekkert að því að kjósa um líf ríkisstjórnarinnar en þetta var ekki sú kosning.

Þegar við spyrjum okkur um það hvað var verið að kjósa um verðum við að spyrja okkur um það hvað sé meginkjarnin í því að gangast við samningi á borð við Icesave og áhrif þess að gangast við slíkum samningi.

Það hef ég kosið að gera.

Spurningin var að festa í sessi ríkisábyrgð vegna skuldbindinga Landsbankans. Ekki skuldbindinga ríkisins eins og margir hafa látið liggja að. Spurningin var að færa áhættuna af viðskiptum einkaaðila yfir á íslenska skattgreiðendur. 

Hvaða þýðingu hefur það ef tiltekin hópur fólks er gerður ábyrgur fyrir mistökum annars fólk?

Jú það hefur áhrif á hegðun þeirra sem þurfa ekki að axla sjálfir ábyrgð á eigin mistökum. Það elur á kæruleysi í viðskiptum, kærileysi stjórnvalda og kæruleysi fjármagnseigenda. 

Þess vegna þýðir niðurstaðan úr Icesave kosningunum að sparifjárseigendum og bönkum eru send þau skilaboð að þau þurfi að sýna meiri varúð í viðskiptum því að Íslendingar hafni því að skattgreiðendur taki á sig tapið. 

Þetta eru skilaboð til stjórnvalda að almenningur sé ósáttur við útbelgt bankakerfi og stöðnunina sem ríkir á þeim vettvangi.

Þetta eru skilaboð til stjónvalda að bæta þurfi löggjöf um bankastarfsemi og viðskipti. 

Þetta eru skilaboð til stjórnvalda um að almenningur geti tekið saman höndum og sagt hingað og ekki lengra.

Afgerandi vilji þjóðarinnar

Athugasemdir

[Elín Sigurðardóttir (IP-tala skráð) 10.4.2011 kl. 18:25]

Jú, það var kosið um Icesave en það er spurning hvort þetta sé ekki samhangandi - Icesave og ríkisstjórnin. Skilaboð Björns Vals til umheimsins þess efnis að forsetinn hafi aldrei ruglað jafn mikið og í dag vekja ekki tilefni til bjartsýni á framhaldið.

[Jakobína Ingunn Ólafsdóttir, 10.4.2011 kl. 19:14]

Þessi ríkisstjórn er alls ekki að standa sig enda allt of margir kjánar þar innanborðs. Ég er eftir sem áður á þeirri skoðun að kosningin um Icesave hafi verið kosningin um Icesave. Líf ríkisstjórnarinnar er annar slagur.

Versta hugsanlega niðurstaða væri að fá sjálfstæðisflokk og framsókn í ríkisstjórn. Þá myndi þjófnaðurinn bara byrja aftur. Við þurfum nýtt fólk og það þarf að finna leið til þess að koma að nýju fólki.

[Elín Sigurðardóttir (IP-tala skráð) 10.4.2011 kl. 19:17]

Ég veit ekki til þess að þjófarnir hafi tekið sér pásu í tíð þessarar ríkisstjórnar. Jú, við þurfum nýtt fólk. Það er alltaf leið.

[Jakobína Ingunn Ólafsdóttir, 10.4.2011 kl. 20:18]

Tek undir það við þurfum nýtt fólk