Aumingja litla krónan

Krónan er í sjálfu sér bara mælikvarði en því miður mjög ótraust sem slík. Ekki þætti smiðnum það þægilegt ef að tommustokkurinn hans skryppi sífellt saman og eitthvað yrði húsið skrítið sem byggt væri eftir leiðbeiningum slíks mælikvarða.

Það er ekki skrítið þótt margir kjósendur þori ekki að hugsa sjálfstætt þegar að allir tommustokkar í samfélaginu virðast skreppa sundur og saman. Svart er hvítt og hvítt er svart á þessari eyju hugtakabrenglunar. 

Sjálfstæðismenn hafa verið duglegastir við að notfæra sér að kjósendur fara í kvíðakast ef það er farið fram á það við þá að þeir hugsi sjálfstætt. 

Það hefur fallið gagnrýnislaust í frjóan jarðveg kjósanda sem aðhyllast frelsi og sjálfstæði að þessi flokkur vinni þessum þáttum brautargengi í samfélaginu þótt veruleikinn sýni allt annað. Sjálfstæðisflokkurinn hefur gengið lengst allra flokka í að setja höft, stuðla að einokun og verðsamráði og selt útlendingum ítök í stjórnun efnahagslífsins. 

Gjaldeyrishöftin eru verk sjálfstæðisflokksins, ítök alþjóðagjaldeyrissjóðsins eru verk sjálfstæðisflokksins, einokunin um sjávarmiðin eru verk sjálfstæðiflokksins og sjálfstæðisflokkurinn á heiðurinn af hugtakinu kjölfestufjárfestar sem er fyrirbæri sem keyrði þjóðarbúið í þrot. 

Samfylkingin ætlaði að ganga fram með svipaðar blekkingar þegar Jóhanna Sigurðardóttir sleppti hugtakinu norræn velferðarstjórn út í loftið. En kjósendur í þeim ranni létu ekki blekkjast og gagnrýndu harðlega þessa misnotkun á hugtakinu og sömu útreið fékk skjaldborgarumræðan. Kjósendur vinstriflokkanna virðast í meira mæli byggja á sjálfstæðri hugsun enda hafa vinstri flokkarnir gengið skemmra í forheimskunni en þeir flokkar sem nú eru við völd.

Fyrir mörgum er sjálfstæðisflokkurinn trúarbrögð og nátengdur kirkjunni. Davíð Oddson er tekinn í heilagra manna tölu og orð hans lög. Frjálshyggjuhugtakinu hefur verið misþyrmt í flokknum sem í raun aðhyllist kommúnisma. Þeir vilja mikil ríkisafskipti til þess að vernda ákveðin fyrirtæki gegn nýliðum. Nýsköpun hefur löngum verið eitur í beinum sjálfstæðisflokksins. 

Löggjafinn og stjórnarráðið er notað til þess að tryggja refsileysi glæpa sem lúta að neytendum eins og t.d. verðsamráð og vörusvik. 

 

Vill að Ísland taki upp bitcoin

Athugasemdir

[Helgi (IP-tala skráð) 8.7.2013 kl. 14:16]

Sæl.

Finnst þér ekkert vandræðalegt að skrifa heilu pistlana sem eru kolrangir og innihaldslausir?

Veistu t.d. af hverju krónan féll haustið 2008? Er það líka Sjöllunum að kenna?

Ber Sf enga ábyrgð á gjaldeyrishöftunum? Sf var í stjórn þegar þeim var komið á og snerti ekki við þeim allan sinn tíma í stjórn. Það hlýtur að vera Sjöllunum að kenna fyrst þú segir það.  

Þú notar hugtakið kommúnismi rangt. Það fyrirkomulag sem er við líði hérlendis er nær því að vera fasismi en kommúnismi þó það sé auðvitað hvorugt.

Frelsi er besta leiðin til að auka velmegun þegnanna. Heldur þú að það sé tilviljun að Kína og Indland séu orðin að efnahagslegum stórveldum? Datt einhver um þröskuld og þá urðu þessi lönd efnahagsleg stórveldi?

Hatur þitt á einum flokk er brjóstumkennanlegt og litar alla þina dómgreind. Nú er ég ekki Sjalli og verð það seint en orðræða þín er öll hin undarlegasta og innihaldslaus.

Hvernig keyrðu "kjölfestufjárfestar" þjóðarbúið í þrot?

[Jakobína Ingunn Ólafsdóttir, 8.7.2013 kl. 14:47]

Helgi það var ástand efnahagsmála eftir áratuga hagstjórn sjálfstæðisflokksins sem var forsenda þess að það varð að taka upp gjaldeyrisihöft. Jöklabréfin, hegðun kjölfestufjárfestanna og sægreifanna sem voru búnir að tæma gjaldeyrisvaraforðann.  Bláa höndin lagði blessun sína yfir þess rányrkju.

Markmiðið að mínu mati á ekki að vera "efnahagslegt stórveldi" enda eiga þau til að hrynja. Markmiðið á að vera gott og réttlátt samfélag. Markmið sjálfstæðisflokksins var að verða efnahagsundur veraldar, stærsta fjármálamiðstöð í heimi (með vitleysinga og þjófa við stjórnvölinn) en svo hrundi allt. 

Eitt af höfuð einkennum kommúnismans eru mikil ríkisafskipti eða jafnvel ofríki eins og tíðkast hefur á Íslandi. Það má svo sem þræta fyrir það eða rökstyðja þennan kommúnisma en hann er engu að síður kommúnismi í þessu tilliti. 

Þessi skríparök að ég hati einn flokk er ákkúrat það skríparök. Mín dómgreind er í góðu lagi enda hef ég verið gagnrýnd fyrir margt en ekki dómgreindarskort. Ég hef gagnrýnt alla stjórnmálaflokka og það fer eftir málefninu. Ástæðan fyrir því að athygli mín beinist nú að sjálfstæðisflokknum er sú að ég sé blikur á lofti þegar þetta hættulega vald er mætt við katlanna. 

Það kom smá klausa um það í fréttablaðinu árið 2010 að ég gagnrýndi Steingrím Sigfússon en það væri heimskulegt að halda því fram að ég hataði hann. Enda væri maðurinn örugglega ágætur bóndi þótt hann hafi hagað sér undarlega í ráðuneytinu. 

[Jakobína Ingunn Ólafsdóttir, 8.7.2013 kl. 14:55]

Og svar við p-essinu:

Hvernig keyrðu kjölfestufjárfestar þjóðarbúið í þrot?

Það er ekkert leyndarmál að þeir settu bankanna á hausinn. Lánuðu sjálfum sér ógrynni fjárhæða og fóur með það úr landi. Komu á Icesave óværunni með blessun sjálfstæðisflokks og framsóknar (Valgerður Sverris samþykkti það). Fóru af stað með það sem kallað hefur verið markaðsmisnotkun og er sýndarviðskipti með hlutabréf í bönkunum og þjónar því að þenja upp hlutabréfaverð. Ólöglegt og glæpsamlegt svindl. Allur fjandinn var á ferðinni og rússneska mafían orðuð við dæmið, peningaþvætti osfrv og Geir Haarde fékk sér lífvörð. Húrra fyrir kjölfestufjárfestum og viðskipum sjálfstæðisflokksins við undirheimanna. 

[Samstaða þjóðar, 8.7.2013 kl. 17:19]

Ég hef skrifað margar greinar þar sem ég hef bent á þá staðreynd að starfræksla Seðlabankans er kommúnismi. Þeir sem styðja rekstur þessarar ríkisstofnunar eru því kommúnistar og þá er að finna víðar en í Sjálfstæðisflokki.

 

Starfræksla seðlabanka er einnig brot á þeirri reglu réttarríkisins, að aðgerðir ríkisvaldsins skulu vera altækar og ekki sértækar. Munurinn á hægri og vinstri í stjórnmálum kemur skýrt fram í því að vinstri-sinnar tala alltaf fyrir sértækum aðgerðum, en alvöru hægri-menn fyrir altækum reglum. Eins og við vitum er samt ekki alltaf farið eftir þeim yfirlýsingum sem höfðingjarnir gefa.

 

Loftur Altice Þorsteinsson.

 

  

[Elle_, 8.7.2013 kl. 18:31]

Mín dómgreind er í góðu lagi enda hef ég verið gagnrýnd fyrir margt en ekki dómgreindarskort.
Og þú heldur þig samt geta klínt skorti á getu og skorti á viti á fólk, pistil eftir pistil, fyrir að nota orð sem þér líkar ekki?  Orð eins og hatur.  Líkl. varst þú fyrsta manneskjan sem klíndir á mig skorti á viti, fyrir að segja það sama og Helgi sagði að ofan og ýmsir hafa sagt um hatur þitt.

[Jakobína Ingunn Ólafsdóttir, 8.7.2013 kl. 19:47]

Nei Elle ég hef  aldrei sagt að þig skortir vit.

Það er hins vegar ekki gáfulegt að segja að fólk hati hitt og þetta sem það gangrýnir. Ég er ekki alltaf hrifin af veðrinu en vilt þú halda því fram að ég hati veður. 

[Helgi (IP-tala skráð) 9.7.2013 kl. 11:35]

Sæl.

Þú ert alltaf við sama heygarðshornið. Hrundi hér s.s. allt vegna þess hvernig Sjallarnir stóðu að málum? Finnst þér það góð skýring? Sá flokkur er svo duglaus að hann gæti ekki valdið hruni þó það væri á hans stefnuskrá.

Olli Sjálfstæðisflokkurinn þá líka hruninu erlendis? Hvað með allt vesenið í Bretlandi? Var það líka Sjöllum að kenna? Hvað með öll bankagjaldþrotin í USA áður en allt fór til fjandans hér? Voru þau Sjöllum að kenna? Hvað með lönd sem sluppu vel frá hruninu? Var það Sjöllum að þakka?

Ef þú ætlar þér að skýra hrunið verður sú skýring að halda vatni og skýra hrunið í heiminum líka enda sömu öfl að verki hér og erlendis. Sú skýring er til fyrir þá sem nenna að bera sig eftir björginni. Þú nennir því ekki því það er svo þægilegt að byggja sína hugmyndafræði á hatri/andúð á stjórnmálaflokk/flokkum. Öfund og hatur er bara uppskrift að volæði, það hafa margar þjóðir upplifað undir sósíalistum.

Hefur þú aldrei spurt þig hvaðan allir peningarnir sem hægt var að lána hér út um alla koppa og grundir komu? Af hverju var allt í einu hægt að lána endalaust upp úr 2004 eða svo en ekki nokkrum árum fyrr? Hvaðan komu allir þessir peningar? Ég er nokkuð viss um að Loftur veit það.

[Jakobína Ingunn Ólafsdóttir, 9.7.2013 kl. 13:37]

Það hefur verið birtur listi yfir þá valdamenn í heiminum sem ollu hruninu í erlendum fjölmiðli. Davíð Oddsson er einn þeirra 25 manna sem eru á þessum lista.

Skýringar á hruninu koma ágætlega fram í rannsóknarskýrslu RNA, í skýrslu og greinargerð AGS og aðrar skýrslur eru á sömu nótum svosem ný skýrsla um ÍLS. 

Nokkrar fræðigreinar hafa verið skrifaðar um málið og birtar bæði í íslenskum og erlendum fræðiritum. Þá hafa nokkrar bækur einnig verið skrifaðar.

Útlán voru fyrst fjármögnuð með lánalínum frá evrópskum bönkum en síðan var lokað á íslensku bankanna og þá stofnaði Landsbankinn (með heimild frá ríkisstjórn framsóknar og sjálfstæðisflokks) Icesave og kaupþing stofnaði einni innlánsreikninga erlendis með yfirboðum á vöxtum. Þetta var gert til þess að mjólka síðustu dropanna úr bönkunum og en sérstaka heimild þurfti frá ríkisstjórninni fyrir þessu framferði.

[Helgi (IP-tala skráð) 9.7.2013 kl. 15:13]

Sæl.

Já, en hvaðan fengu erlendu bankarnir sitt fé? Hvaðan komu allir peningarnir sem bankarnir gátu allt í einu lánað út? Af hverju gátu bankar (innlendir sem erlendir) ekki lánað út um allt nokkrum árum fyrr? Hér er bara hálf sagan sögð. Hvaðan komu allir peningarnir sem hægt var að lána út um allan heim? Ekki reyna að segja innlán þegar vextir voru lágir. 

Dabbi blessaður gæti ekki valdið hruninu þó hann reyndi það, Seðlabanki Íslands er svo lítið batterí. Þeir sem telja Dabba hafa valdið hruninu ættu að leggjast aftur yfir sín gögn.  

Landsbankinn þurfti enga heimild frá yfirvöldum hér til að stofna Icesave frekar en Kaupþing Edge reikningana. Þetta máttu bankarnir skv. EES og þurftu ekki heimild stjórnvalda hér til. Vel má vera að FME hafi lagt blessun sína yfir þetta formlega séð en bankarnir máttu gera þetta skv. EES samningnum. Bankarnir gerðu þetta til að fjármagna sig enda farið að þrengjast um á lánamörkuðum, ekki til að mjólka síðustu dropana úr neinum banka enda um innlánsreikninga að ræða. Reyndu nú að fara rétt með staðreyndir.

Ef bankamenn hafa gerst sekir um glæpi skulum við vona að sérstakur ráði við að koma þeim í grjótið. Enn er sérstakur ekki byrjaður á endurskoðendum sem mér finnst mjög einkennilegt þó til sé skýrsla frá erlendu endurskoðunarfyrirtæki sem gefur þeirra vinnubrögðum falleinkunn. Ætli það sé Framsókn og Sjöllum að kenna?

[Jakobína Ingunn Ólafsdóttir, 9.7.2013 kl. 15:26]

Það þurfti bæði leyfir viðskiptaráðherra til að stofna útibú erlendis og leyfi í gestalandinu.

[Jakobína Ingunn Ólafsdóttir, 9.7.2013 kl. 15:39]

http://www.althingi.is/altext/136/s/0270.html

[Elle_, 9.7.2013 kl. 21:50]

Bankarnir gátu opnað útibú í Bretlandi og Hollandi vegna EES-samningsins eins og Helgi sagði að ofan.  ICESAVE var jú í báðum löndum.  Jakobína, linkurinn sem þú vísar í þarna segir ekkert um að ísl. stjórnmálamenn hafi getað stoppað það.  Þeir urðu hinsvegar að fá starfsleyfi þarlendra stjórnvalda sem fóru líka með eftirlitið.

[Elle_, 9.7.2013 kl. 21:57]

Með þeir meinti ég bankarnir, ekki stjórnálamenn.

[Jakobína Ingunn Ólafsdóttir, 9.7.2013 kl. 22:03]

Bankarnir gátu ekki opnað útibú erlendis nema með sérstakri heimild yfirvalda bæði á Íslandi og einnig í viðkomandi landi.

Þegar Landsbankinn setti upp Icesave sparifjárreikninga sína haustið 2006 gerði breska fjármálaeftirlitið, FSA, enga athugasemd við að reikningarnir voru settir upp í útibúi, ekki dótturfélagi. Leyfi til að setja upp útibú fékkst greiðlega í skjóli evrópskra reglna um að banki, sem hefur starfsleyfi í einu landi á Evrópska efnahagssvæðinu, getur opnað útibú í öðrum EES-löndum. Þetta er ekki algjörlega sjálfvirkt fyrirkomulag, viðkomandi land þarf að leyfa þetta en reglurnar eru samt nokkuð liprar fyrir bankana.

[Elle_, 9.7.2013 kl. 22:19]

Ofar segir þú: - - - Útlán voru fyrst fjármögnuð með lánalínum frá evrópskum bönkum en síðan var lokað á íslensku bankanna og þá stofnaði Landsbankinn (með heimild frá ríkisstjórn framsóknar og sjálfstæðisflokks) Icesave - - -
Ef þú endilega vilt kenna stjórnmálamönnum: Hver var viðskiptaráðherra og með meginábyrgð á bankamálum Íslendinga árið 2006 þegar ICESAVE var stofnað í Bretlandi?

[Jakobína Ingunn Ólafsdóttir, 9.7.2013 kl. 22:54]

Valgerður Sverrisdóttir

[Elle_, 9.7.2013 kl. 23:03]

Eg á eftir að sjá það svart á hvítu að stjórnmálamenn hafi geta ráðið þessu (nema kannski óbeint þeir sem samþykktu EES-samninginn eins og hann er nú).  En það er e-ð hrikalega bogið við það EF 1 stjórnmálamaður eða nokkrir geti ráðið þessu fyrir heila þjóð.