Verndum börnin

Ég hef skrifað hugleiðingar og birt þær hér undanfarinn sólarhring. Ég hef notað þennan vettvang til þess að fá útrás fyrir áhyggjur af því sem er framtíðin ber í skauti sér. Ég er þó einn þeirra íslendinga sem hef ekki verið að fjárfesta í hlutabréfum og verðbréfum heldur notað góðærið til þess að mennta mig og ala upp börnin mín sem fara bráðum að sleppa pilsfaldinum.

Áhyggjur mínar varða fyrst og fremst börnin mín. Hvað ber framtíðin í skauti sér fyrir þau? Þurfa þau að flýja land til þess að geta haft umráð yfir launum sínum í stað þess að ráðstafa þeim til þess að greiða skuldir sem landsfeðurnir hafa steypt þeim í?

Það sem hefur verið að gerast í síðustu viku er endahnúturinn á löngu ferli sem rekur uppruna sinn til þess þegar að auðlindir hafsins voru gefnar útvöldum. Það sem hefur verið að gerast í vikunni er einnig upphafið að ferli sem enn er ekki fyrirséð hvernig verður.

Ég eins og fjöldinn horfi tortrygginn til aðgerða yfirvalda. Því veldur fyrst og fremst hvernig ríkisstjórnin, með forsætisráðherra í fararbroddi, hefur stöðugt beint athyglinni frá eigin aðgerðum og aðgerðaleysi og kynnt sig sem fórnarlömb kreppunnar. Hvernig er hægt að treysta fólki sem kynnir sig sem leiksopp örlaganna til þess að stjórna landinu. Fólki sem lendir í kreppunni og virðist skorta sjálfsgagnrýni til þess að skoða atburðarrásina af heiðarleika.

Fréttir berast stöðug af harmleikjum meðal almennings en á sama tíma halda stjórnmálamenn uppteknum hætti með tilburðum til þess að sefja þjóðina. Það er ótrúlega ósmekklegt af forsætisráðherra að koma fram núna í auglýsingu og segja „verndum börnin".

Foreldrar hafa mátt standa sveittir við að verja börnin sín gegn markaðöflunum undanfarinn áratug. Bæði vegna beinna árása í formi auglýsinga og söluherferða sem hefur verið beint gegn börnum en einnig vegna þeirra gilda sem umhverfið hefur staðið fyrir að innræta þeim og læðast lúmskt inn í barnssálina.

Atburðir síðustu daga sýna mikilvægi þess að innræta börnum að treysta eigin dómgreind og vera ekki of fylgispök við fína frasa. Þetta á líka við okkur foreldranna. Við verðum að reyna að sjá í gegn um orðskrúð stjórnmálamanna og gera okkur grein fyrir því hvernig tilburðir þeirra margra hverra miða að því að verja hagsmuni þeirra sjálfra, tryggja áframhaldandi völd og slá skjaldborg um hina útvöldu.