Er ekki í lagi með Ríkisstjórnina?

Þjóðin á EKKI að ganga í ábyrgð vegna Icesave. Það er deginum ljósara að áhættu- og fagfjárfestar gengu viljugir að borði þegar þeir lögðu fjármuni sína inn a Icesave. Íslenskur almenningur átti enga hlutdeild í þeim viðskiptum.

það er gjörsamlega óskiljanlegt hvers vegna Ríkisstjórnin tekur í mál að ganga af þessum samningum sem er algjörlega í hag Breta. Fjárfestar sem fengu greitt fyrir að taka áhættu tapa engu á fífldyrfsku sinni en venjulegur Íslendingur sem vissi ekki einu sinni af þessum viðskiptum, hvað þá að hann hafi haft hag af þeim á að taka áhættuna á sig.

Ég spyr, er ekki í lagi með Ríkisstjórnina?

Sigmundur Davíð og Þór stóðu sig vel í Kastljósinu. Fulltrúi Ríkisstjórnarinnar kom illa út enda vondan málstað að verja.

Ég tek hjartanlega undir með Sigmundi þegar hann bendir á að Íslendingar eru í mjög sterkri samningsstöðu einfaldlega vegna þess að ESB vill ekki að það afhjúpist hversu gallað regluverk þeirra er.

Það er ekki bara vanhæfni Ríkisstjórnarinnar sem kemur berlega í ljós í þessum afleita samningi heldur einnig alkunn tilhneiging hennar til þess að velja vanhæfa klíkuvini í verkefni sem þeir ráða ekkert við.

það er óhuggulegt að horfa upp á að stjórnmálamenn hafa ekkert lært á óförum stjórnarfars á Íslandi og halda uppteknum hætti þótt að framtíð þjóðarinnar í áratugi sé í húfi.

Athugasemdir

[Jón Steinar Ragnarsson, 6.6.2009 kl. 07:41]

Þeim finnst þetta bara ok að borga 5.5% vexti á meðan stýrivextir englandsbanka eru 0.5%  Sem þýðir að við borgum margfalt meira fyrir lánið, en skuldin hljóðar upp á, auk þess sem búið er að gera eignarnám fyrir þessu fyrir löngu með ólöglegum hætti.

Já en eignarsafn bankanna dugar fyrir helming, segja þeir. Hver á bankana? Við eigum bankana. Hver eru eignasöfnin fyrir utan verðlaus skuldabréf og goodwill? Jú það er Kvóti, land, fyrirtæki, húseignir, vatnsréttur, orkulindir etc. Semsagt landið allt með öllu sem í því er.

Gjalþrota heimilin eiga að borga, sem savarar 600.000 kalli á ári bara í vexti af þessu láni. Þá er höfuðstóllinn eftir og vextir og höfuðstóll af AGS láninu og fleiri lánum.

Ætlar fólk að stoppa þetta eða er það í taugaáfalli og of lamað til þess að bregðast við?

Ef þetta verður gert, þá heyrir lýðveldið Ísland sögunni til.

[Ómar Geirsson, 6.6.2009 kl. 09:04]

Blessuð Jakobína.

Við verðum að vona að a.m.k. einn þingmaður lýsi yfir að um ólög sé að ræða sem skuldbindi ekki þjóðina.  Þegar þjóðin hefur vikið föðurlandssvikurunum frá völdum þá mun hún rifta þessum gjörningi með tilvísun í ólögmæti málsins og ólögmætrar málsmeðferðar því Alþingi er óheimilt að samþykkja þessar skuldbindingar nema að stjórnarskránni sé breytt fyrst og heimilt verði að skuldsetja þjóðina þannig að hún missi sjálfstæði sitt.  

Tel reyndar ólíklegt að það náist í gegn en þó  er aldrei að vita hvað sjónhverfingarmeistarar lyginnar geta gert í sínum hráskinnsleik.

En við borgum ekki krónu af skuldum Björgólfs og Björgólfs.

Kveðja að austan.

[Hákon Jóhannesson (IP-tala skráð) 6.6.2009 kl. 11:38]

Þegar fjárglæframennirnir frömdu verknaði sína (m.a. höndluðu með þúsundir milljarða) tóku þeir um leið veð í fjármunum  landsmanna - og það var þeim að fullu ljóst.

Það er ekki löglegt að taka veð í eignum og fjármunum annarra án leyfis.

Það er ekki hægt að halda svona áfram að níðast á saklausum borgurum þessa lands. Það eiga Jóhanna og Steingrímur J að vita, en samt halda þau áfram.

Það er mín skoðun að það hefði fyrir síðustu alþingiskosningar átt að lýsa Samfylkinguna vanhæfa sem stjórnmálflokk vegna aðildar þeirra að hruninu.

[Rakel Sigurgeirsdóttir, 6.6.2009 kl. 13:07]

Niðurstaða mín við spurningunni sem þú varpar fram í fyrirsögninni að þessari færslur er: Augljóslega ekki!

[Árni Gunnarsson, 6.6.2009 kl. 14:58]

Þjóðin vék föðurlandssvikurunum frá í búsáhaldabyltingunni Ómar. Þessi ríkisstjórn skuldbatt þjóðina ekki til að greiða þessa reikninga. Það gerði ríkisstjórn Geirs H. Haarde í nóvember s.l. Þessi ríkisstjórn er að bjarga því sem bjargað varð eftir að allir frestir til að vísa kröfunum til dómstóla runnu út í höndum þeirrar stjórnar. (Eða telur sig vera að því)

Hefur einhver gleymt að segja okkur frá þessu Ómar? Ég stóð í sömu meiningu og þú allt þar til ég sá Kastljósið í gærkvöld.

Nú erum við nefnilega komin þangað í tíma að okkur ber skylda til að setja alla atburðarás þessarar skelfingar í tímaröð. Annars eigum við á hættu að ruglast á orsök og afleiðingu. 

[Jakobína Ingunn Ólafsdóttir, 6.6.2009 kl. 15:17]

Árni föðurlandssvikararnir sem þjóðin vék frá í búsáhaldabyltingunni er enn við völd og dafna vel í gegn um samfylkingu.

Ertu búin að gleyma því að samfylkingin hékk eins og fiskur á roði með sjálfstæðisflokknum þangað til allir frestir voru úti.

Hún fórnaði þjóðinni fyrir von um góða stóla fyrir menn úr sínum röðum.

Skammarlegasti framgangum mála sem ég hef séð í sögunni.

[Jón Steinar Ragnarsson, 6.6.2009 kl. 15:49]

Mundu Árni minn að RÚV er helsta málpípa evróputrúboðsins og engu að treysta sem þar kemur fram, sem sést af því að þeir eru að beina sjónum fólks að atvikaröð og sökudólgum. Skiptir það nokkru andskotans máli í stöðunni Árni? Hvern fjandann ertu að fara?  Það er verið að selja landið undan þér og þú pælir í því hverjum það er að kenna í stað þess að andmæla.

Er fólk almennt búið að tapa glórunni eða er þetta bara ég og Jakobína??

[Árni Gunnarsson, 6.6.2009 kl. 16:54]

Þú ert reiður Jón Steinar. Það skil ég mætavel því ég er líka reiður og við erum skyldug til að vera reið. Það sem ég var að basla við að koma fram var það að ekki er eingöngu núverandi stjórnvöldum um að kenna að skrifað er undir nauðungarsamninga í umboði (stolnu)okkar. Hafi ég skilið aðdraganda þessa nýja Kópavogssamnings þá var undirlægjuhátturinn undirbúinn af strandkapteininum sem hafði lofað fullum greiðslum. Þetta las ég úr orðum Álfheiðar Ingadóttur í Kastljósi og eins í hádegisspjallinu á Rúv í morgun. Ég verð því að líta svo á að ekki hafi verið um aðra skárri kosti að ræða en þennan. Ég leyfi mér ennþá að trúa því að Vinstri grænir séu andvígir aðild að ESB, en það er augljóst að sú klíka hefur núna fingurinn á þessu máli. En trú mín á heilindi V.g. í þessu máli og fleiri málum dvína með hverjum degi. Þarna á ég við forystu flokksins.

Í stuttu máli finnst mér þetta vera kjarklausir bjálfar og hringlandi.

[Ómar Geirsson, 6.6.2009 kl. 17:24]

Blessaður Árni.

Ef þú nennir að kíkja á bloggið hjá mér þá með fullri virðingu fyrir Álfheiði, þá hakkaði ég þessa þvælu í mig,

Icesave dæmið er eitt og annað er beiting hryðjuverkalag breta.  Óskyld mál og það var sá frestur um ákveðna málmeðferð sem rann út í janúar.  En samt er hægt að stefna bretum en á öðrum forsendum.

Icesave málið er rekið fyrir dómstólum Evrópusambandsins.  Og það er grunnskylda ríkisstjórnar Íslands að láta reyna á réttmæti þeirrar kúgunar sem við erum beitt.

Og það er lygi hjá Álfheiði að fyrri ríkisstjórn hafi skuldbundið núverandi stjórn.  Slíkt er ekki hægt.  Hún samdi um viðræður við bretana en ekki sjálfkrafa að samþykkja allt sem þeir færu fram á.  Það er ekki einu sinni misskilningur að halda öðru fram, það er lygi hjá Álfheiði Ingadóttur.

Og þar fyrir utan getur engin ríkisstjórn með orðum eða yfirlýsingum skuldbundið íslenska ríkið til fjárútgjalda eða ábyrgða.

Aðeins Alþingi getur gert slíkt og slíkar ábyrgðir þurfa að standast stjórnarskrá Íslands.  Ábyrgðin má ekki vera án upphæðar og hún má ekki stefna fjárhagslegu sjálfstæði þjóðarinnar í voða.  Til dæmis ef rússneska mafían mútar 63 alþingismönnum til að afhenda Island glæpaflokkum, þá mega þeir það ekki samkvæmt stjórnarskránni.

Þetta dæmi er hliðstætt nema glæpahópurinn heitir ESB og allt í þessu máli er ólöglegt.  Allt.

Kveðja að austan.

[Jakobína Ingunn Ólafsdóttir, 6.6.2009 kl. 18:05]

Ég tek undir það sem þú segir Ómar.

Það verður að fara að snúa ofan af öllum þessum villum og rangtúlkunum sem Ríkisstjórnin hellir yfir fólk.

Hvert einasta skref sem stigið hefur verið í þessu máli er undarlegt og vinnur gegn okkar velferð.

Ég spyr t.d. þeirrar einföldu spurningar: Hvers vegna eiga Bretar eða Hollendingar rétt á þjónustu ríkissjóðs á Íslandi sem er fjármagnaður af Íslendingum nema auðvitað í þeim tilvikum sem bretar eða hollendingar eru búsettir á Íslandi og tilheyra þar með íslensku skattasvæði.

[Árni Gunnarsson, 6.6.2009 kl. 19:53]

Ómar: Þakka þér ávarpið og góðar ábendingar. Það er nú komið svo að mér er það næstum óbærileg tilhugsun að hér finnist engir stjórnmálamenn lengur eða heill stjórnmálaflokkur sem hefur einurð til að standa heils hugar með þessu landi. Ég er ekki félagi í V.g. en ég hef haft mætur á varðstöðu þeirra gegn þeim óhappamönnum sem níða náttúru þessa lands og eru reiðubúnir að selja hana fyrir baunadisk. Ég hef trúað þeim þegar þeir hafa talað öðrum einarðlegar gegn ásælni erlendra ríkja í auðlindir okkar og ég hef treyst þeim öðrum betur til að skilja hversu lítið vantar nú upp á að við glötum mörgu því sem mér er öðru helgara. Þess vegna hef ég hrakist svolítið undan þeim staðreyndum sem ég nú tel mig standa frammi fyrir.

Ég hef reyndar fyrr staðið frammi fyrir því að eiga ekki samleið með neinum stjórnmálaflokki.

[Ómar Geirsson, 6.6.2009 kl. 20:59]

Blessaður Árni.

Þetta er sorgleg staðreynd en sönn.  Félagshyggjan hefur brugðist þjóðinni.  Í andstöðunni var málflutningur þeirra félaga, Steingríms og Ögmundur, sannur og réttur.   Og þeir gáfu þjóðinni von, von um að loksins væri hægt að losa um krumlur öfgafrjálshyggjunnar  á íslensku þjóðlífi.  Hún eyðilagði svo margt, þar á meðal þann ágæta íhaldsflokk, Sjálfstæðisflokkinn og Framsókn gekk fyrir björg. 

Vonin lá í Samfylkingunni og VinstriGrænum.  Svo bauðst Samfylkingunni tækifæri til að svíkja hugsjónir sínar og það gerði hún svikalaust.  Og því miður virðist svipaður gjörningur hafa hent VinstriGræna.  Það er þröngur hópur fólks, sem réði öllu hjá síðustu ríkisstjórn, sem mótar núverandi stjórnarstefnu.  Þetta er fámenn klíka úr embættismannakerfinu, viðskiptalífinu og stétt háskólahagfræðinga.  Klíka sem sá ekkert athugavert við gamla kerfið þó eldar loguðu allt í kring og hrun þjóðfélagsins hafi verið óumflýjanlegt.  Heimskreppan gerði lítið annað en að flýta þessu hruni.  Og nú er  þessi klíka á fullu að endurreisa gamla kerfið.  Og almenningur er látinn borga.  

Steingrímur segist vera í félagshyggjustjórn.  En það eru öfugmæli.  Engin félagshyggjustjórn lýtur helstefnu Nýfrjálshyggjunnar sem Alþjóðagjaldeyrissjóðurinn hefur þröngvað upp á skjólstæðinga sína.  Þú lætur ekki barnaníðinga stjórna dagheimili og þú lætur ekki Alþjóðagjaldeyrissjóðinn endurreisa íslenskt efnahagslíf, þ.e. ef þú ert félagshyggjumaður.

Á hvorugu er hægt að gefa afslátt.  Það má vel vera að óvinurinn sér sterkari í augnablikinu en hann verður það um aldur og ævi ef þeir sem að lífsskoðun og hugsjón hafna stefnu hans, leggja niður vopn og ganga til liðs við hann.  Svona til að milda ásjónu ranginda hans.  Steingrímur er eins og fóstran sem réði sig á dagheimili barnaníðinga og samdi við þá að láta börnin í friði á kaffitímum.  Kannski skárra að fá frið þann tíma en auðvitað átti hún að fá foreldrana til að hrekja þá úr landi.  Eins áttu VinstriGrænir ekki að fara í stjórn fyrr en öruggt væri að Óbermin hypjuðu sig heim eða þá að öruggt væri að þeir væru til gagns en ekki ógagns.  Það eru ekki allir níðingar hjá Alþjóðagjaldeyrissjóðnum en stefna hans er glæpur gagnvart mennskunni og mannúð.

Nýfrjálshyggjan er helstefna eins og kommúnisminn og nasisminn.

Og ef þjóðin er án flokka þá verður hún að stofna nýjan flokk.

Kveðja að austan.