Ekki sama hver brotnar

Það er svo sem gott og blessað að þyrla sé send eftir sjómanni sem fótbrotnar og það þykja fréttir þegar að fílefldir karlmenn lenda í slíkri þolraun.

Þetta minnir mig á atvik sem átti sér stað þegar ég var sparisjóðsstjóri í Súðavík. Þá kemur dóttir mín inn sem þá var um 12 ára til mín í sparisjóðinn og heldur undir handlegginn á sér og er aum á svipinn.

"Hvað er að" spyr ég og hún svarar "ég er handleggsbrotin." "Nú má ég sjá" segi ég og sé svo að handleggurinn á henni er eins og s í laginu. Sem sagt opið brot.

Þetta var um miðjan vetur og allt á kafi í snjó, brjálað veður og snjóflóðahætta í hlíðinni til Ísafjarðar.

Ég átti ekki bíl og var í vandræðum hvernig ég átti að bera mig að.

Ég hringi í lækninn á Ísafirði og segi við hann að barnið sé handleggsbrotið. Hann spyr þá: "Hvernig veistu að hún sé handleggsbrotin?" "Hún sagði mér það" svaraði ég og augljóst var að lækninum þótti þetta vera hin versta móðursýki í okkur mæðgunum og ekki nóg með það heldur vorum við svo hrokafullar að við þóttumst geta greint opið brot.

Ég lýsti því síðan fyrir honum hvernig handleggurinn var og sagði að það þyrfti að koma henni til Ísfjarðar. "Getur þú ekki komið með hana á morgun spurði þá læknirinn"....humm....og síðan neitaði hann að aðstoða mig frekar.

Með hjálp góðra fannst síðan kona í þorpinu sem átti stóran jeppa og var tilbúin af gæsku sinni að keyra okkur út á Ísafjörð þrátt fyrir að mikil snjóflóðahætta væri í hlíðinni og aftakaveður. Og er ég henni ævarandi þakklát fyrir að leggja líf og limi í hættu til þess að koma barninu undir læknishendur.

Ferðin út á Ísfjörð var auðvitað skelfileg og ekki tók betra við þegar á sjúkrahúsið kom því að deyfingin mistókst og beinbrotið var afrétt við mjög litla deyfingu. Ég fæ alltaf samviskubit þegar ég hugsa til þess hvað barnið mátti þola.  

Flogið eftir slösuðum sjómanni

Athugasemdir

[Jóna Kolbrún Garðarsdóttir, 23.10.2009 kl. 02:18]

Aumingja barnið að þurfa að bíða eftir læknishjálp....

[Eygló, 23.10.2009 kl. 05:12]

Stelpukvölin :(   já, og þú líka.

[Aríel Pétursson (IP-tala skráð) 23.10.2009 kl. 05:36]

farðu í rassgat

[Rósa Halldórsdóttir (IP-tala skráð) 23.10.2009 kl. 06:48]

Læknar eru kapítuli útaf fyrir sig. Sumir eru ekki manneskjur heldur vélar sem halda að þeir séu guðir á mála hjá lyfjafyrirtækjunum.

[Kristján (IP-tala skráð) 23.10.2009 kl. 09:39]

Hvað meinaru með "ekki sama hver brotnar" og "Það er svo sem gott og blessað að þyrla sé send eftir sjómanni sem fótbrotnar og það þykja fréttir þegar að fílefldir karlmenn lenda í slíkri þolraun" 

Ertu að gera lítið úrt því að manninum sé komið undir læknishendur vegna þess að þú og dóttir þín lentu í þessari óskemmtilegu reynslu fyrir mörgum árum?

[Jakobína Ingunn Ólafsdóttir, 23.10.2009 kl. 15:20]

Já Kristján ég er hrædd um að Þeim fótbrotna hefði ekki þótt gott að vera bara sagt að koma á morgun.

Ég er auðvitað ekki að gagnrýna að menn sé sóttir þegar þeir slasast. Það má hins vegar spyrja hvort að ekki sé sjálfsagt að börn séu líka sótt þegar þau slasast.

[Aríel Pétursson (IP-tala skráð) 24.10.2009 kl. 18:04]

Vertu ekki svona gífurlega einföld Jakobína mín. Sjómenn geta ekki labbað í næsta hús og fengið nágrannann á stóra jeppanum til að skutla sér í land, ég hef sjálfur verið með opið brot úti á sjó og verið sóttur af þyrlu - enda hefði það tekið um 7 tíma að sigla með mig vestur og svo aðra 5 í bæinn af því að aðgerðin var það flókin að ekki hefði verið mögulegt að framkvæma hana á Ísafirði.

Svona þyrluútkall kostar sennilega frá hálfri milljón og uppúr (og það er ekki heldur ódýrt að sigla með menn í land, meðaltogari eyðir um 350 lítrum af olíu á klukkustund). Skutlið með stelpuna hefur sennilega ekki kostað mikið meira en 10 þúsund kall og auk þess er biðtími eftir þyrlu svona vestur á land vel yfir eina klukkustund.

Hugsaðu líka út í að það telst nú seint ákjósanlegasta flugveðrið það sem þú kallar aftakaveður. Mundirðu leggja líf þyrluáhafnar í hættu fyrir þetta?

Hugsa, Jakobína, hugsa!

[Jakobína Ingunn Ólafsdóttir, 24.10.2009 kl. 18:24]

Sæll Aríel ef þú skilur færslu mína þannig að ég hafi eitthvað á móti því að sjómenn fái þjónustu þá ertu á villigötum. Einnig ert þú á villigötum ef þú heldur að fólk geti fengið hjálp við opnu beinbroti í næsta húsi í einöngruðum sjávarþorpum úti á landi. Ég hélt að ég hefði komið því til skila að það var nánast ófært til Ísafjarðar og þetta var því ekkert skutl.

Það er gott og blessað að þér skildi vera komið til Reykjavíkur þar sem þú fékkst hátækniþjónustu.

Það þótti hins vegar ekki viðeigandi að kosta slíku til fyrir barnið enda varð aðgerðin algjört kúður, deifingin mistókst og beinið gréri ekki rétt saman.

Það getur vel verið að þér þyki opin beinbrot sjómanna æðri opnum beinbrotum barna en ég er bara á annarri skoðun.