Myrkraverk fyrri ríkisstjórna rannsökuð

 Pistill skrifaður í mars 2009

Það er aumkunarlegt að hlusta á foringja myrkraverka síðustu ríkisstjórna bera af sér sakir. 

Þeir sem staðið hafa í framvarðarlínu flokkana hafa ávallt verið tilbúnir til þess að selja stefnu og hugsjónir fyrir völd. Langur ferill spilltrar ákvörðunartöku sem leidd hefur verið af leppum auðvaldsins í ríkisstjórn hefur skilið þjóðina eftir í grafalvarlegri stöðu. Þessu eigum við ekki að gleyma nú rétt fyrir kosningar. Það er of snemmt að fyrirgefa.

Sökudólgarnir sitja nú fastir í sekt sinni og koma ekki auga á lausnir sem afneita auðhyggjunni og klíkusamfélaginu sem ríkt hefur hér um áratugi. Þeir eru ekki tilbúnir til þess að horfast í augu við að lausnir auðhyggjunnar duga skammt við nýjar aðstæður.

Það er svo sannarlega gott ef vel tekst til að auka útflutning hvort sem það er í hugbúnaði eða öðru því viðskilnaður síðustu ríkisstjórnar gerir það að verkum að þörf er fyrir allan gjaldeyrir sem unnt er að afla til þess að standa skil á erlendum vaxtagreiðslum. Afla þarf 100 milljarða á ári til þess að standa skil á erlendum vaxtagreiðslum.

Til þess að takast á við þau gríðarlegu vandamál sem sjálfstæðisflokkur, framsóknarflokkur og samfylking hafa skapað þjóðinni þarf tiltekna heildarsýn.

Í fyrsta lagi grunnvandinn er gjaldeyrisvandi. Við öflum ekki nægilegs gjaldeyris til þess að standa undir innflutningi eins og hann er í dag auk þess að standa undir gríðarlegri vaxtabyrði vegna erlendra lána.

Til þess að leysa þennan vanda þarf að ráðast á alla þætti hans. Það þarf að auka útflutning (gjaldeyrisöflum) það þarf að minnka innflutning (auka sjálfbærni) og það þarf að gera hagstæðari samninga við erlenda lánadrottna.

Til þess að auka útflutning og minnka innflutning þarf að efla atvinnulíf í landinu. Það þarf að auka matvælaframleiðslu bæði á hráefni og fullunnum vörum. Það þarf að nýta hugvit til þess að framleiða hér iðnaðarvörur sem nýta hráefni sem fæst innanlands. Það þarf að auka menntun og þekkingu sem eflir framleiðsluiðnað. Það þarf að aflétta einokun milliliða sem draga máttinn úr öðrum atvinnuvegum. Það þarf að taka á spillingunni.

Ýmsum finnst hallærislegt þegar talað er um aukna sjálfbærni en það er enn hallærislegra ef fólk þarf að líða neyð. Þá er ekki síður hallærislegt að láta börnin okkar greiða skuldir okkar.

Sjálfstæðismenn, framsókn og samfylkinguna dreymdi um að á Íslandi myndi rísa stórfenglegasta fjármálamiðstöð í heimi. Það er hallærislegt. Þegar yfirvöldum varð ljóst að allt stefndi í óefni, landið orðið stórskuldugt var farið að selja hinn raunverulega bjargvætt, auðlindirnar, fyrir slikk.

Þegar Títanik var að sökkva fóru þau að selja björgunarbátanna.

Auðlindirnar sem skapa raunveruleg verðmæti eru bjargvættur Íslendinga. Fiskurinn sem syndir í sjónum, vatnið í iðrum jarðar, orkan og mannvitið er vopnið sem þarf að beita í baráttunni.

Múgsefjun, villandi upplýsingar, áróður, lygar og fals eru hindrun á veginum til uppbyggingar og til lítils sóma fyrir þá sem taka þátt í að koma slíku á framfæri.

Fyrst birt á þessu bloggi 29. mars 2009

Einkavæðing bankanna rannsökuð

Í ánauð vatnsbaróna

Vatnið er eins og andrúmsloftið lífsnauðsynlegt fyrir manninn og óhöndlanlegt. Vatnið er í sífelldri hringrás og því nokkuð erfitt að festa hendur á því eða þinglýsa því.

Spurningin um eignarrétt á vatni er því spurning um völd og afnotarétt. Í Bólivíu tókst postulum nýfrjálshyggjunar að staðfesta einkarétt á rigningunni. 

Fyrir tuttugu árum var nokkuð auðvelt að verða sér út um fisk í soðið sér að kostnaðarlausu eða við lítinn tilkostnað. Þetta var á meðan auðlindin var á forræði þjóðarinnar. Í dag er fiskurinn á Íslandi greiddur sama verði og þar sem hann er hvað dýrastur í heiminum. 

Þetta er þróun sem hefur átt sér stað eftir að auðlindin var einkavædd.

Hversu langt er í það að vatnið verði greitt sama verði og þar sem það er dýrast í heiminum. Postular nýfrjálshyggjunar munu bera við einhverri nýfrjálshyggjukenningu til þess að réttlæta að einkaaðilar græði á því að fólk fái sér vatnssopa. 

Það þarf að stöðva barónana í myrkraverkum þeirra

Hver er framtíðarsýn stjórnvalda?

Váin sem sækir að þjóðinni vegna vatnalaganna hefur lengi blasað við sjá td. hér

 

 

Mótmæla fyrirætlunum um afnám vatnalaga