Suðurnesin eru rík af auðlindum

Suðurnesjamenn eiga ríkidæmi í auðlindum. Jarðvarminn, sjávarauðlindin, alþjóðaflugvöllur og ónýttur mannauður ætti að vera uppspretta tækifæra og framfara á svæðinu.

Hvað hefur þá farið úrskeiðis?

Atvinnuuppbygging

Umræðan um álver í Helguvík er suðupottur. Eina vonin í hugum margra. Ég er þeirrar skoðunar að manneskjan eigi að vera í fyrsta sæti og náttúruvernd eigi ekki að hamla því að maðurinn geti lifað af landinu. Við verðum þó að stíga varlega til jarðar og muna að börnin okkar þurfa líka að lifa af landinu. Stjórnarfar á Suðurnesjum hefur bent til þess að ýmsir forystumenn hafi ekki séð fram yfir næstu mánaðarmót í stefnumótun og ákvarðanatöku.

 

Reykjanesbær hefur verið skuldsettur upp í rjáfur án þess að þess sjáist merki í aukinni velsæld og atvinnusköpun. Vonandi vilja menn ekki meira af slíku. Fjárfestingar þurfa að skila viðvarandi atvinnusköpun, ekki bara næsta mánuðinn eða næstu tvö til þrjú ár. Vandann þarf að leysa til framtíðar. Um þessar mundir eru um 1500 manns

 atvinnulausir á svæðinu.

 

Myndin er eftir  Eyjólf Vilbergsson

 

Frumréttur byggðarlaga

Með því að einblína á álver í Helguvík er verið að halda umræðu um aðra valkosti í gíslingu. Ég vil sjá að HS orka verði tekin úr höndum á þeirra sem keyptu nýtingarréttinn fyrir kúlulán og hrunkrónur. Jarðvarmaauðlindin er fæðingarréttur Suðurnesjamanna sem hafa fest þann rétt í sessi með því að standa að uppbyggingu mannvirkja sem skapa verðmæti af þessari auðlind. HS orka skipti um hendur vegna athafna fjárglæframanna í stjórnmálum og bönkum.

 

Að sækja fiskimiðin er hefðarréttur íbúa á Suðurnesjum sem sótt hafa sjóinn í aldir. Að meina fólki að sækja sér lífsbjörg i þessari atvinnugrein er brot á mannréttindum.

 

Orkan úr iðrum jarðar á að styrkja fyrirtæki á Suðurnesjum en ekki að veikja þau með því að láta þau greiða niður orku til stóriðju eins og nú er gert. Ef Suðurnesjamenn fengju að nýta sér sjálfir orkuna sem þeir sjálfir hafa byggt upp myndi þeim reynast auðvelt með aðgangi að hóflegu fjármagni að byggja upp ilrækt og aðra mannfreka starfsemi sem leysir atvinnuleysisvandann á Suðurnesjum. Nándin við alþjóðaflugvöll gerir íbúum auðvelt að koma ferskri vöru á erlenda markaði.

 

Munurinn á smáiðnaði og fyrirtækjarekstri annars vegar og stóriðju hins vegar er í stórum dráttum fyrir heimamenn að arðsemin af rekstri heimamanna skilar sér í vasa þeirra sjálfra og skattinum til bæjarfélagsins. Stóriðjan flytur hinsvegar arðinn úr landi og kemur sér undan því að greiða skatt með því að flytja skuldir erlendra móðurfyrirtækja á álverin hér á landi. Ég hvet því fólk að hugsa um atvinnuuppbyggingu í stærra samhengi.

 

Reikna með 200 milljóna halla

Athugasemdir

[Jóhannes Laxdal Baldvinsson, 3.11.2010 kl. 02:18]

Þetta var nú nokkuð góð færsla Jakobína Það sem er að eru nokkrir miðaldra kallar sem neita að víkja. Árni Sigfússon og Vilhjálmur Egilsson eru þar efstir á blaði. Þetta eru mennirnir sem halda Suðurnesjum í gíslingu vitlausra áhersla í atvinnuuppbyggingu

[Freyr (IP-tala skráð) 3.11.2010 kl. 02:33]

Þakkaðu fyrir að VG sé ekki við völd þarna... þá væri ennþá verið að finna lóð fyrir fiðlustrengjaverksmiðjuna og grasalækninn. Sjálfstæðisflokkurinn er örugglega að gera allt sem í hans valdi stendur til að efla atvinnuuppbyggingu og má þar margt telja til. Hverjar eru töfralausnir þínar Jóhannes?

[Robert (IP-tala skráð) 3.11.2010 kl. 07:53]

Sammála þér.      Eftir að hafa dinglast í kringum kanann í áratugi, virðast suðurnesjamenn hafa stökkbreyst í einhverskonar kampara, þeir verða að átta sig á að það dæmi er búið.  Álversdraumar í dag, eru rugl, þar er orkuverð skrúfað niður með blekkingum og aðstoða við það innlendir tækifærissinnar í pólitíkusaliðinu, fá fyrir það vel í vasann. Norðmenn hafa nánast kastað þessum mengunariðnaði út hjá sér, og fá mun meira útúr raforkusölu fyrir vikið, ofaná að vera lausir við gífurlega loftmengun auk annarrar mengunar af þessu.   þarna ætti að hefja fiskeldi með nýtísku tækni, fá tækniaðstoð frá Noregi, þeir kunna þetta vel, afurðirnar færu ferskar beint í flugvélar í Lefsstöð, þaðan liggja leiðir til allra átta. Skálarnir standa þarna næstum klárir í þetta dæmi, allt annað er til staðar, Norðmenn hafa aldrei grætt eins mikið á fiskeldi eins og á síðasta ári, eftirspurn eftir afurðum fer sístækkandi  eftir hverju eruð þið að bíða?

[Jakobína Ingunn Ólafsdóttir, 3.11.2010 kl. 18:55]

Ég held að Árni Sigfússon vilji einhverjar skyndilausnir til þess að breiða yfir klúrðrið sem hann hefur skapað.

Það er bráðnauðsynlegt að skoða alla möguleika vel og vera þess meðvituð að sú leið sem er valin í dag hefur áhrif til langframa.

Vanstilltir stjórnmálamenn sem hafa klúðrað efnahag þjóðarinnar eru varasamir