Business í fjármálaráðuneyti?

Eftirfarandi grein birtist í Smugunni í dag:

Það hefur borið á því að íslenskir valdhafar hafi lítinn skilning á tilgangi stjórnmálanna og hlutverki stjórnsýslunnar. Stjórnmálamenn hafa skrúfað sig upp í gegn um flokksmaskínurnar með klíkutengslum við aðra stjórnmálamenn og þjónkun við fjármálaöfl. Á leiðinni selja þeir sál sína og fara að þjóna vilja fámennra hagsmunahópa.

Nú spyr kannski einhver hvað sé til ráða. Hvernig er hægt að lækna sjúkt kerfi? Forsenda breytinga í samfélaginu er breytt hugarfar. Eins og Eva Joly bendir á í nýlegu viðtali hafa Íslendingar treyst í blindni á valdhafanna og að lýðræðisaga skorti á Íslandi. Íslenskir stjórnmálamenn og forkólfar flokka og samtaka hafa komist upp með að fleygja fram fullyrðingum og ekki þurft að færa rök fyrir máli sínu eða útskýra hlutina. Þetta kallast umræða á lágu plani og er bein atlaga að lýðræðinu. Lýðræði þrífst á vönduðum samskiptum og opinni umræðu. Vönduð samskipti eru ekki samskipti sem felast í því að fólk þori ekki að tjá hug sinn eða gagnrýna valdhafanna.

Umræðan á að vera markviss, gagnrýnin og þolinmóð. Hún á að vera forvitin, þreifandi og kalla á svör. Efla þarf skilning almennings á samfélaginu og hvað hugtök eins og lýðræði, frelsi og réttlæti þýða. Hvað eru mannréttindi? Mannréttindi fela í sér að jafnræði í aðgangi að gæðum sem landið gefur af sér og að grundvöllur að þátttöku í atvinnulífi og samfélagi sé almennt tryggður.

Hrun íslensk þjóðarbús er afleiðing af áratuga spillingu sem viðgengist hefur við litlar mótbárur. Við þessi kynslóð sem byggjum samfélagið í þeim samtíma sem fær hrunið og afleiðingar spillingar yfir sig verðum vakna upp og huga að framtíð Íslands.

Það er skylda okkar að takast á við það óþægilega verkefni að breyta okkur sjálfum. Það er óþægilegt að láta af trausti við valdhafanna og spyrja gagnrýninna spurninga. Í því felst áhætta. En það er áhætta sem við verðum að taka ef við viljum betra samfélag .

 

Ráðuneyti með 2,5 milljarða

Athugasemdir

[Pétur Örn Björnsson (IP-tala skráð) 22.1.2010 kl. 14:35]

Mikið væri það gleðilegt og farsælt, ef allir alþingismenn, ráðherrar og embættismenn ríkisins skrifuðu eitthvað í líkingu við það sem Jakobína skrifar hér og meintu það -af fullri alvöru- eins og hún gerir. 

Virkilega hnitmiðuð grein og sýnir mikinn skilning á vanda umræðunnar hér á landi og jafnframt hvað okkur skortir mjög hina díalektísku hugsun og framkvæmd í verki.  Tesa og antitesa og áfram veginn í frjórri hugsun og þróun.
Eða þurfum við enn um sinn að lifa við froðu og froðu og lamandi stöðnun og sérhygli valdaklíkna 4-flokksins?

[Hákon Jóhannesson (IP-tala skráð) 22.1.2010 kl. 15:04]

 Tímabær hugleiðing 

"Á leiðinni selja þeir sál sína og fara að þjóna vilja fámennra hagsmunahópa"...

Þetta er mjög athyglivert í ljósi þess að viðkomandi þiggja atkvæði tugþúsunda í kosningum almennings sem treystir á að viðkomandi standi við þau kosningaloforð sem hann gefur.   Hvað gengur þessum kosnu fulltrúum til  - gangi viðkomandi bak orða sinna ?  

Hvers virði í raun eru mútugreiðslurnar fyrir viðkomandi t.d. þegar upp er staðið ?(ath.:  mútur sem eru mjög algengar hér, en fáir þora að kalla réttu nafni í umræðunni - kallast "styrkir"  )

Er ekki sjálfsvirðingin og heilindin meira virði í lok dagsins ?

Mikið væri nú gaman að fá ráðgjafasálfræðinga til að tjá sig meira í umræðunni og útskýra hvað er á gangi hér í þjóðfélaginu, en ég veit að fagmenntaðir sálfræðingar með mikla starfsreynslu sjá í gegnum margt sem er illskiljanlegt venjulegu fólki.  

[Jakobína Ingunn Ólafsdóttir, 22.1.2010 kl. 16:03]

Sæll Pétur og ég þakka þér fyrir vinsamleg orð

Sæll Hákon

Þessi spurning sem þú veltir upp er athyglisverð. Margir þeir sem hafa látið beygja sig vegna mútugreiðslna sem eru í raun skiptimynt fyrir þá sem múta virðast glata sýn á hið stóra samhengi. 

Skaðinn sem þeir valda er gríðarlegur miðað við þessa skiptimynt/mútugreiðslurnar sem þeir taka á móti.