Veröld, snýtt úr nösum auðvaldsins

Þeir hafa skapað furðuveröld sem við eigum erfitt með að skilja og fóta okkur í. Svartholshagkerfi sem saug til sín verðmætin úr atvinnulífinu. Markmið núverandi ríkisstjórnar, fyrrverandi ríkisstjórnar og Alþjóðagjaldeyrissjóðsins er að bjarga svartholinu sem eyðir verðmætum í landinu.

Bjargirnar eru teknar af fólki, venjulegu fólki. Trillukarlarnir mega ekki veiða fiskinn úr sjónum. Grænmetisbændum er haldið niðri með okurverði fyrir orkuna en erlendir iðjuhöldar fá hana fyrir slikk.

Rétturinn til þess að nýta auðlindirnar er seldur erlendum fjárfestum.

Rétturinn til þess að draga til sín almannafé hefur verið seldur kjölfestufjárfestum.

Milliliðum sem drepa niður frumkvöðla og litla atvinnurekendur með einokun, verðsamráði og einkasamningum er veitt brautargengi.

Þeir bola í burt nýsköpun og sjálfsbjargarviðleitni. Frumkvöðlar sem skapa atvinnu eru flæmdir úr landi.

Furðuveröldin býður ekki upp á sannleika, venjur, visku og annan metnað en þann sem þjónar græðgi svartholsins.

Í furðuveröldinni er erfitt að átta sig. Upplýsingar eru villandi. Allt er á ferð og flugi og erfitt er að festa hendur á hlutum. Sjónhverfingar. Örugginu er eytt, friðsældinni er eytt og orðræðan er kúguð. Ekkert er ekta. Falsið er tekið fram yfir þekkinguna.

Þessi furðurveröld er veröld kúgunar og fátæktar. Veröld vopnaskaks.