Michael Hudson í Íslenskri þýðingu

Greining í heild sinni í þýðingu Gunnars Tómassonar

 

Ísland og Lettland geta ekki borgað, og borga því ekki

Michael Hudson

Geta Ísland og Lettland greitt erlendar skuldir fámenns hóps einkavina valdhafa? Evrópusambandið og Alþjóðagjaldeyrissjóðurinn hafa sagt þeim að umbreyta einkaskuldum í opinberar skuldbindingar og endurgreiða þær með hækkun skatta, niðurskurði ríkisútgjalda og eyðingu sparifjár almennings. 

Reiði fer vaxandi ekki einungis í garð þeirra sem söfnuðu skuldunum - Kaupþing og Landsbanki í gegnum Icesave og einkaaðilar í löndunum við Eystrasalt og í mið-Evrópu sem veðsettu fasteignir og einkavæddar ríkiseignir langt úr hófi fram - heldur líka gagnvart erlendum lánardrottnum sem þrýstu á stjórnvöld að selja banka og aðra helztu innviði hagkerfa til innherja.

Stuðningur við aðildarumsókn Íslands að ESB hefur minnkað í um þriðjung þjóðarinnar og Harmony Center flokkurinn, sem studdur er af stórum hluta rússnesku-mælandi Letta, hefur náð meirihluta í Riga og stefnir í að verða vinsælasti flokkurinn á landsvísu. Í báðum tilfellum hafa mótmæli almennings skapað vaxandi þrýsting á stjórnmálamenn að takmarka skuldabyrði við eðlilega greiðslugetu landanna.

Um helgina skipti þessi þrýstingur sköpum á Alþingi Íslendinga.   Þar varð samkomulag, sem kann að verða frágengið í dag, um skilyrði fyrir verulegum endurgreiðslum til Bretlands og Hollands vegna útborgana þeirra á innistæðum þarlendra eigenda Icesave reikninga.

Mér vitanlega er þetta fyrsta samkomulagið frá þriðja áratug síðustu aldar sem takmarkar afborganir af skuldum við greiðslugetu viðkomandi lands. Greiðslur Íslands takmarkast við 6% af vexti vergrar landsframleiðslu miðað við 2008.  Ef aðgerðir lánardrottna keyra íslenzka hagkerfið niður með óvægnum niðurskurði ríkisútgjalda og skuldaviðjar kynda undir frekari fólksflutninga úr landi, þá verður hagvöxtur enginn og lánardrottnar fá ekkert greitt.

Svipað vandamál kom til umræðu fyrir liðlega 80 árum vegna skaðabótagreiðslna Þýzkalands vegna fyrri heimsstyrjaldar. En margir stjórnmálamenn átta sig enn ekki á því að eitt er að merja út afgang á fjárlögum og annað að geta greitt erlendar skuldir. Hver sem skattheimta stjórnvalda kann að vera þá er vandinn sá að breyta skatttekjum í erlendan gjaldeyri. Eins og John Maynard Keynes útskýrði, ef skuldsett lönd geta ekki aukið útflutning sinn verða greiðslur þeirra að byggjast á lántökum eða eignasölu.  Ísland hefur núna hafnað slíkum eyðileggjandi valkostum.

Greiðslugetu hagkerfis í gjaldeyri er takmörk sett. Hærri skattar þýða ekki að stjórnvöld geti umbreytt auknum skatttekjum í erlendan gjaldeyri. Þessi staðreynd endurspeglast í afstöðu Íslands gagnvart Icesave skuldum, sem áætlað er að nemi helmingi af vergri landsframleiðslu þess. Með þessari afstöðu sinni mun Ísland væntanlega leiða önnur hagkerfi í pendúlssveiflu frá þeirri hugmyndafræði sem telur endurgreiðslu allra skulda vera helga skyldu.  

Fyrir hagkerfi landa sem losnuðu undan stjórn Sovétríkjanna felst vandinn í því að vonir brugðust um að sjálfstæði 1991 hefði í för með sér vestræn lífsgæði.  Þessi lönd jafnt sem Ísland eru enn háð innflutningi. Hnattræna eignabólan fjármagnaði hallann á viðskiptajöfnuði - lántökur í erlendri mynt gegn veði í eignum sem voru skuldlausar þegar löndin urðu sjálfstæð. Nú er bólan sprungin og komið að skuldadögum. Lán streyma ekki lengur til Eystrasaltslanda frá sænskum bönkum, til Ungverjalands frá austurrískum bönkum, eða til Íslands frá Bretlandi og Hollandi. Atvinnuleysi eykst og stjórnvöld skera niður útgjöld til heilbrigðis- og menntamála. Í kjölfarið fer efnahagslegur samdráttur og meðfylgjandi neikvæð eignastaða fjölda fyrirtækja og heimila.

Óvægnar niðurskurðaráætlanir voru algengar í löndum þriðja heims frá 8. til 10. áratugar síðustu aldar, en evrópsk lýðræðisríki hafa takmarkað þolgæði gagnvart slíku verklagi. Eins og málum er nú háttað eru fjölskyldur að missa húsnæði sitt og fólksflutningar úr landi eru vaxandi. Þetta voru ekki fyrirheit nýfrjálshyggjunnar.

Þjóðir spyrja ekki bara hvort greiða eigi skuldir, heldur líka - eins og á Íslandi - hvort hægt sé að greiða þær. Ef það er ekki hægt, þá leiðir tilraun til að greiða þær einungis til frekari efnahagssamdráttar og hindrar lífvænlega þróun hagkerfisins.

Munu Bretland og Holland samþykkja skilyrði Íslands? Keynes varaði við því að tilraun til að knýja fram erlenda skuldagreiðslu umfram greiðslugetu krefðist stjórnarfars á sviði fjárlaga og fjármála sem er þjakandi og óvægið og gæti hvatt til þjóðernissinnaðra viðbragða til að losna undan skuldakröfum erlendra þjóða.  Þetta gerðist á þriðja áratug 20. aldar þegar þýzka hagkerfið var kollkeyrt af harðri hugmyndafræði um ósnertanleika skulda.

Málið varðar praktíska meginreglu: skuld sem er ekki hægt að greiða verður ekki greidd. Spurningin er einungis hvernig slíkar skuldir verða ekki greiddar. Verða þær afskrifaðar að miklu leyti? Eða verður Íslandi, Lettlandi og öðrum skuldsettum löndum steypt í örbirgð til að merja út afgang í tilraun til að komast hjá vanskilum?

Síðarnefndi valkosturinn getur knúið skuldsett lönd til stefnubreytingar. Eva Joly, franski saksóknarinn sem aðstoðar við rannsókn á íslenzka bankahruninu, hefur varað við því að svo gæti farið að Ísland stæði uppi með náttúruauðlindir og mikilvæga staðsetningu sína: „Rússlandi gæti til dæmis fundist það áhugavert." Kjósendur í löndum sem losnuðu undan stjórn Sovétríkjanna gerast æ meira afhuga Evrópu vegna eyðileggjandi hagstjórnarstefnu sem nýtur stuðnings ESB.

Eitthvað verður undan að láta. Mun ósveigjanleg hugmyndafræði víkja fyrir efnahagslegum staðreyndum, eða fer það á hinn veginn?

 

Höfundur er hagfræðiprófessor við University of Missouri

Fleiri fari að dæmi Íslands

Athugasemdir

[Jóna Kolbrún Garðarsdóttir, 17.8.2009 kl. 01:41]

Ætli það fari ekki á hinn veginn?

[Einar Björn Bjarnason, 17.8.2009 kl. 01:52]

Mjög góð grein.

Ísland, verður að semja við alla stærstu lánadrottna, um takmörkun greiðslubyrði, og um niðurfellingur skulda, breytingum lána í víkjandi, o.s.frv.

Þetta starf þarf að hefjast hið fyrsta.

Draumur margra ESB sinna, um að ESB sé einhverskonar "Fairy god mother" sem leysi vandamál öll, að  t.d. að skuldir okkar verði fyrirgefnar eftir nokkur ár, þegar allir sjái hve aum við erum orðin, þegar við höfum gengið í gegnum hreinsunareld og erum ekki lengur vond - - er að mínu mati, hrein tálsýn.

Kv.

[Guðni Karl Harðarson, 17.8.2009 kl. 02:12]

Ein af aðal spurningu sem er varpað hér fram er sú hvort Bretar og Hollendingar muni samþykkja þetta. Mín skoðun er sú að það mun ekki verða gert. Og ef, sem þýðir einungis að þessu máli verði ekki lokið á milli landana á næstunni.

Sú óþægilega staða getur komið upp er að Bretar og Hollendingar neiti frekar en við hefðum neitað! Mér finnst þetta vera undarleg skammsýni manna í fjárlaganefnd. Og undarlegt hvort þau hafi ekki spurgt sig hvort þetta verði samþykkt eða ekki.

Sem sýnir algerlega vangetu í að halda leverage yfir málinu. Nema málið sé svo klækjandi að því sé einhverngveginn snúið í hring.

Einar ég er sammála þér í meginatriðum varðandi samninga við lánadrottan á lánum, nema ekki varðandi Icesave því við eigum aldrei að viðurkenna að það sé skuld!

[Guðni Karl Harðarson, 17.8.2009 kl. 02:28]

Málið er að það er búið að viðurkenna að þetta sé skuld! Sem voru algjör mistök! Þó að þessi takmörkun sé að við greiðum ekki nema það sem þjóðarbúið ráði við!

[Högni Jóhann Sigurjónsson, 17.8.2009 kl. 12:28]

Guðni, það er til mjög einföld leið útúr skuldaloforðinu, við setjum Árna Matt, Geir Haarde. Ingibjörgu Sólrúnu og Björgvin G í fangelsi fyrir landráð.

[Júlíus Björnsson, 17.8.2009 kl. 12:36]

Vitorðsmenn efnahagshryðjuverkamannanna eru ekki einir í heiminum.  

[Loftur Altice Þorsteinsson, 17.8.2009 kl. 12:51]

Það mikilvægasta sem liggur fyrir Alþingi, er að lýsa því yfir að Icesave er ekki lagaleg, tryggingafræðileg, eða siðferðileg skuld. Komandi kynslóðir eiga skilið að hendur þeirra séu ekki bundnar.

Komandi kynslóðir, sem verða vonandi dugmeiri en sú sem nú ræður málum, munu þá eiga þann möguleika að hafna skuldaklafanum.

[Einar Björn Bjarnason, 17.8.2009 kl. 14:39]

Líkur fara vaxandi, að við stöndum frammi fyrir, að hrasa inn í "default" þ.s. ekkert bendir til þess, að núverandi stjórnvöld átti sig á nauðsyn þess, að semja við aðra kröfuhafa um eftirgjöf skulda.

Sú skoðanakönnun, sem var byrt á RUV.is, sýnir einnig mjög sterka tortryggni frá erlendum fjármálastofnunum, og fjárfestum, gagnvart Ísl. stjórnvöldum.

Sú tortryggni, gæti skaðað möguleika okkar, á að ná þessum aðilum að samingaborðinu. Upplifun þeirra, virðist vera að Ísl. stjórnvöld, og umsjónaaðilar, hafi sýnt þeim lítilsvirðingu.

Hvað Icesave varðar, hef ég ákveðið að kaupa þá röksemd, að það væri þess virði að leitast við að semja um það mál, og þá sem þátt í því ferli að semja við kröfuhafa Íslands almennt, þ.e. fyrsti liður þess.

En, þ. getur alveg verið að Bretar og Hollendingar, hafni þessu samingstilboði, sem þá myndi þýða, að formleg viðurkenning Ísl. á þeirri skuld, hefði ekki tekið gildi.

Við erum þá, allavegna búin að sýna ákveðinn, samingsvilja.

Kv.

[Loftur Altice Þorsteinsson, 17.8.2009 kl. 17:22]

Að mínu mati, fer Michael Hudson frjálslega með málvexti. Hann nefnir ekki að Icesave-tryggingin er ólögleg og byggð á fjárkúgun Breta og Hollendinga. Það er á Icesave-greiðslur sem verið er að ræða um að setja skorður, en ekki hefur komið til tals að setja slíka eftirvara á almenn lán.

Hudson gefur í skyn að þessi gjörningur sé upphafið á almennri neitun ríkja að greiða óhóflegar skuldir. Þetta sé ég ekki í stöðunni, þótt það væri eðlilegt eins og Hudson hefur margoft bent á.