AHA, Ísland ekki nægilega skuldugt

Ríkissjóður hefur tekið lán upp á þúsund milljarða. Umræða um þessi lán hefur einskorðast við vaxtabyrðina en lítið fjallað um hvernig eigi að fjármagna endurgreiðslur.

Stjórnmálamenn forðast það eins og heitan eldinn að nota hugmyndaflugið til þess að finna leiðir til þess að grynnka á erlendum skuldum. Hugur þeirra virðist vera fastur í þráhyggju sem kallar á meiri lán og meir vanhæfni. Guð forði okkur frá því að gera eitthvað sjálf og leita sjálfbærra lausna.

Þetta kemur vel fram í ummælum Más Guðmundssonar:  „Þá þyrftum við að treysta á innri öfl Ísland og halda áfram að kaupa gjaldeyri,“

Ef við eflum atvinnulíf og útflutning þá þurfum við ekki að lifa á lánum sem börnum okkar er ætlað að borga. 

Segir bankamenn í startholum

Æ æ frekar hallærislegt

Eina huggunin var þegar allt hrundi haustið 2008 var að nú yrðu kannski einhverjar breytingar í íslenskum stjórnmálum. Það sýnir sig hins vegar að stjórnmálamönnum er fyrirmunað að brjótast út úr gömlum venjum sem einkennast af lágkúru og óvirðingu við vönduð vinnubrögð.

Ég minnist samtals sem ég átti við breskan prófessor sem var í þeirri stöðu að þurfa að ráða stórann hóp fólks til starfa í nýrri deild. Ég spurði hann hvað honum fyndist reyna mest á við þessar mannaráðningar. Jú svaraði hann mér finnst mikilvægt að velja hæfasta fólkið og láta ekki glepjast af því hverja mér líkar best við.

Það er skylda þeirra sem ráða fólk til starfa að velja hæfasta fólkið. Skattgreiðendur eiga heimtingu á því að að störfum sé fólk sem lamast ekki undir álagi og ráði við flókin verkefni.

Íslenskir stjórnmálamenn og stjórnendur eru hrokafullir og haga sér eins og að þeir séu að höndla með eigin fjármuni en ekki fjármuni skattgreiðenda. Stundum þegar ég sé þetta fólk birtast á skjánum og horfa framan í þjóðina án þess að blikka fyllist ég meðaumkun með þessu fólki sem hefur svo lítinn skilning á eigin vangetu og hversu skaðlegt það er venjulegu fólki á Íslandi.

Tólf ráðnir án auglýsingar

Ég, ég og ég

„Eins og ég hef útskýrt opinberlega tel ég að landskjörstjórn hafi ekki gert nokkurn skapaðan hlut af sér í þessu máli og leit svo á að ég hefði algjörlega hreinan skjöld í málinu sjálfur. Ég hafði þess vegna engar efasemdir um það að það væri skynsamlegt að taka við þeirri tilnefningu sem ég var beðinn um að taka. Ég leit á það sem traustsyfirlýsingu sem ég er mjög stoltur af.“

Já það virðist ekki fara á milli mála að þessi maður á vel heima undir handarjaðri stjórnmálaforystunnar

„Með hreinan skjöld“

Styður Isavia kynferðislega áreitni

Þessir frétt er dæmigerð fyrir fyrringuna sem ríkir í íslensku samfélagi. Ekki síst þá stofnanamenningu sem ríkir í fyrirtækjum.

Stjórnandi er dæmdur fyrir kynferðislega áreitni og fyrirtækið heldur að það sé því til framdráttar að styðja hinn brotlega. 

Það hefur verið mjög áberandi í íslensku samfélagi undanfarin 15 til 20 ár að menn reyni að gera ofbeldi gegn konum "lögmætt". Ýmsir framámenn í samfélaginu styðja þessa hugmynd og láta sér mjög annt um réttindi þess sem brýtur á öðrum. 

 

Styðja yfirmanninn hjá Isavia

Icesave kostar 1.200 milljarða ef neyðarlögunum verður hnekkt

Það verður ekki skafið af fjármálaráðherranum að hann hefur verið einn af ötlustu áróðursvélum Hollendinga og Breta. Sennilega í öðru sæti á eftir Þórólfi Matthíassyni sem kveður hart að því í erlendum fjölmiðlum að skuldir Björgólf Þórs séu skuldir skattgreiðenda á Íslandi.

Bendi á þessa færslu Friðriks Hansen:

Við verðum að gera okkur grein fyrir því að kröfuhafar í þrotabú gömlu bankana sem eru öll helstu fjármálafyrirtæki heims eru nú með í gangi málaferli sem ætlað er að hnekkja neyðarlögunum.

Færustu lögspekingar heims vinna nú að því að fá neyðarlögunum hnekkt. Verði neyðarlögunum hnekkt þá eignast þessir kröfuhafar þrotabú Landsbankans. Verðmæti þess er um 1.200 milljarðar. Þessir aðilar munu ekki gefa þessa 1.200 milljarða eftir baráttulaust.

Verði neyðarlögunum hnekkt fyrir dómi þá verða innistæður ekki lengur forgangakröfur í þrotabúum bankana.

Það þýðir að við getum ekki notað eignir þrotabús Landsbankans til að greiða Icesave.

Ef við samþykkjum ríkisábyrgð á Icesave og neyðarlögunum verður hnekkt og við fáum ekki krónu úr þrotabúi Landsbankans upp í Icesasve þá þarf ríkissjóður samt að borga þessar 1.200 ma.

Þess vegna hafa Bretar og Hollendingar sótt það svo fast að fá þessa ríkisábyrgð. Þeir óttast að neyðarlögunum verði hnekkt og ef það gerist þá verður að vera ríkisábyrgð á Icesave þannig að við neyðumst til að taka fé úr ríkissjóði til að borga Icesave.

Verði neyðarlögunum hnekkt þá falla 1.200 milljarðar á ríkisjóð.

Þess vegna má ekki samþykkja Icesave.

Það má ekki veita þessa ríkisábyrgð.

 

Samúð erlendra fjölmiðla ekki nóg

Vill selja skattgreiðendur eins og búpening

Skilningur á því hvernig menning verður til er beitt vopn í baráttunni fyrir réttlæti. Almennt er þekking og skilningur á nálgun sem skoðar áhrif umræðu og athafna á menningu ekki mikils virt á Íslandi.

Umræðan í fjölmiðlum

Eftir bankahrunið tröllreið hagfræðileg nálgun nýfrjálshyggjunnar umræðu í fjölmiðlum.

Þegar við hlustum á umræðuna um Icesave í dag virðist athyglin beinast að því hvort tapið sé meira eða minna af Icesave samningnum eða dómstólaleiðinni. Þessi nálgun fjölmiðla nánast einokar umræðuna í dag. Lögfræðingar stíga fram með hugmyndir um það hvaða bellibrögðum Hollendingar og Bretar geti beitt til þess að fá hagstæða niðurstöðu

Icesave samningurinn felur fyrst og fremst í sér brot á mannréttindum. Ófædd börn eru í þessum samningi skuldbundin til þess að rástafa tekjum sínum til Hollendinga og Breta. Þetta á ekki bara við um Icesave samninginn heldur stefnu núverandi og fyrrverandi ríkisstjórna sem fylgt hafa tilmælum Alþjóðagjaldeyrissjóðsins um að auka skuldir ríkissjóðs.

Stjórnvöld fóru að ráðum Fitch matsfyrirtækisins vorið 2008 sem ráðlagði að færa ekki starfsemi bankanna úr landi. Þeir byggðu þetta á því að ef bankarnir yrðu fluttir úr landi þá hefðu þeir ekki aðgang að íslenskum skattgreiðendum. Þetta er sagt berlega í skýrslu sem er að finna á heimasíðu Landsbankans.

Menning og trú manna

Svo við víkjum aftur að menningunni þá er menning mjúka hliðin á samfélaginu. Í henni felst það sem er sameiginleg trú okkar á það hvað sé lögmætt og réttmætt. Hún er sýn okkar á samfélagið og hvernig við byggjum upp líf okkar innan þess. Víða hefur vond trú þróast í menningu. Sem dæmi má nefna að börn í Papua New Guinea eru líflátinn vegna þess sem telst til sameiginlegrar trúar manna. Hugmyndafræði Nasismans lá til grundvallar athöfnum manna í seinni heimstyrjöldinni. Sú hugmyndafræði þróaðist en tók að lokum á sig mynd mikilla skelfinga.

Menning er í sífelldri þróun m.a. vegna þess að hugmyndir manna um hvað sé réttlátt og hvað sé lögmætt er í sífelldri þróun. Ef við lítum á hina vestrænu heimsmynd í dag þá sjáum við þróun sem felur í sér að stjórnvöld eru farin að versla með skattgreiðendur eins og búpening og gera íslenskar skatttekjur að útflutningsvöru.

Sennilega er framtak íslenskra stjórnvalda það öfgafyllsta í þessum efnum en þau eru að reyna að kaupa sér friðþægingu í alþjóðasamfélaginu með því að selja því íslenska skattgreiðendur. Þetta er birtingarmynd á hugmyndafræði sem er engu minni öfgafull en sú hugmyndafræði sem þróaðist í Evrópu á fyrri hluta tuttugustu aldar og kannski arfleifð af henni.

Að umskapa menningu (cultural engeneering)

Hvernig nær svona hugmyndafræði að festa rætur í samfélagi? Icesave málið má skýra alla vega að hluta með því að athyglinni hefur kerfisbundið verið haldið frá eigindlegri skoðun á þessu málefni. Félagsfræðilegar forsendur eru hunsaðar og einblínt er á viðskiptalegar forsendur og réttmæti þess að selja skattgreiðendur.

Almennt sér maður rök eins og að þetta séu sérlega vondir skattgreiðendur sem eiga jeppa og þess vegna eiga þeir bæði að borga jeppana sem þeir keyptu og svo aftur að borga jeppanna með því að borga Icesave. Ég held að það sjái það hver skynsamur maður og kona að þessi rök standast ekki. Nýjustu rökin eru að menn tapi á dómstólaleiðinni. Þetta bendir til þess að stjórnmálaforystan líti svo á að dómstólar og þ.m.t. alþjóðadómstólar sé vopn hinna sterku.

Ég túlka t.d. málflutning Stefáns Más þannig að Hollendingar og Bretar hyggist ekki fara í mál út af réttmæti krafna þeirra heldur ætli þeir að nota sjálfan Icesave samninginn og kæra íslensku ríkisstjórnina fyrir samningsrof. Alþjóðagjaldeyrissjóðurinn beitti Íslendinga þvingunum og neyddi þá til þess að ganga til samninga við Hollendinga og Breta. ESB studdi við bakið á Alþjóðagjaldeyrissjóðnum og Gordon Brown lýsti því yfir í breska þinginu að hann hefði loforð frá Alþjóðagjaldeyrissjóðnum. Gleymum ekki hryðjuverkalögunum.

Íslensk stjórnvöld vinna að því hörðum höndum að innleiða þá trú á Íslandi að þetta ferli sé lögmætt og að íslensku þjóðinni beri að beygja sig undir þessa kúgun. Þetta er tilraun til þess að skapa menningu ánauðar, menningu undirlægju, menningu þægðar, menningu dómgreindarleysis og menningu varnarleysis.

Alþingismenn hafa guggnað

Þá breytast forsendur Icesaveútreikninga

Tilgangur gjaldeyrishaftanna er að halda gengi krónunnar uppi. Enn eru krónubréf í landinu og enn eru peningar í landinu sem vilja fara út. Þegar eftirspurnin eftir erlendum gjaldeyri eykst mun gengi krónunnar lækka og skuldbindingar ríkisstjórnarinnar í pundum og evrum hækka.

Það er verið að nota lífeyrissparnað launþega til þess að beila út krónubréfin. Hugsanlegt hefur verið talið að íslenskir lífeyrissjóðir komi að því með erlenda eignastöðu sína, á svipaðan hátt og gert var í Avens-viðskiptunum í fyrravor,“ segir í Morgunkorni Íslandsbanka.

Seðlabankastjóri sagði þó að fyrsta skrefið fælist í því að losa um aflandskrónurnar svokölluðu, m.a. með gerð skiptasamninga og eins með því að heimila að þessar krónur yrðu notaðar í beinar fjárfestingar hér á landi að uppfylltum tilteknum skilyrðum segir í fréttinni. Merkilegt er hvernig talað er undir rós. Hverjir eiga þessar aflandskrónur sem Már talar um og hverjir eiga að fá að fjárfesta og í hverju?

Hvað með gjaldeyrismisferli álveranna? 

Næstu skref í afnámi hafta

Vitsmunaverur á ferðinni

Það hefur verið lítið um að stjórnvöld hafi stutt við framtak sem er ódýrt og mannfrekt.

Það er ánægjulegt að sjá þetta framtak.

Það mætti einnig fara í meira mæli út í tilraunastarfsemi með fleira. T.d. epli og kirsuber sem þurfa minna skjól. 

Held samt að 750 þúsund dugi skammt.

Ríkisstjórnin vill demba milljörðum í að stuðla að stóriðju og það væri ágætt ef hún myndi bara hætta því og huga að öðrum tækifærum. 

Leggja fé í ylræktarver

Sýnir fals stjórnvalda í hnotskurn

Fáum ætti að dyljast að stjórnvöld á Íslandi bera litla umhyggju fyrir velferð almennings í landinu.

Það er áberandi hvernig fjölmiðlar fara fram með rangfærslur til þess að telja almenningi trú um að það sé þeirra hagur að styðja ríkisábyrgð á Icesave.

Við vitum að fjölmiðlarnir eru allir í eigu þeirra sem settu landið á hausinn. Það er einnig líka nokkuð augljóst að flokkarnir eru í eigu þeirra sem settu landið á hausinn. Það má sjá hvernig þessir aðilar ganga í takt núna. 

Við búum við þá kaldranalegu staðreynd að bæði fjölmiðlar og stjórnmál eru í eigu þeirrar mafíu sem sópaði verðmætum út úr landinu.

Kosið 9. apríl

Það sem ekki er sagt upphátt

Samskipti íslenskra yfirvalda við hollensk og bresk bera þess merki að stjórnvöld þessara landa líti á skattgreiðendur sem búfé sem hægt sé að versla með í alþjóðasamningum.

Íslenskum stjórnvöldum hefur verið falið að veita Bretum og Hollendingum aðgang að íslenskum skattgreiðendum. 

Ég spyr mig hvaða hugmyndafræði býr að baki þessum athöfnum stjórnvalda. Málið gengur út fyrir alla venjulega skynsemi enda eru skynsemisrök ekki notuð í málinu heldur hræðsluáróður og illa skýrðar ályktanir. 

Ef við horfum á Alþingi Íslendinga þá sjáum við þar fólk sem annarsvegar hefur setið á þingi í áratugi og hinsvegar sem eru úr fjölskyldum sem hafa átt fulltrúa á þingi í áratugi og sumir eru hvortveggja í senn. 

Alþjóðlegt kerfi hefur verið hannað utan um athafnir og hegðun stjórnvaldsins. Vel þjálfaðir menn koma fram á vettvanginn og nota löng orð í skírskotun til kerfisins og fréttinni er gefið yfirbragð réttlætingar á því að farið sé með skattgreiðendur eins og búpening.

Í áratugi hefur farið fram á mótun hugarfars stjórnmálamanna og embættismanna sem sitja í skjóli þeirra.  Þeir vita að forréttindi þeirra byggja á því að það takist að féfletta almenning í skjóli blekkinga og leyndar. Þeir vita að samstaða þeirra sem eru markvisst að brjóta niður velmegun almennings er forsenda þess að þeir viðhaldi forréttindum sínum sem skilja stóran hluta þjóðarinnar eftir snauða.

Fjöldi fólks trúir því að núverandi ríkisstjórn sé á einhvern hátt skárri en sú sem áður sat. Jafnvel þótt að stjórnmálaflokkarnir haldi fram þeirri ímynd að þeir skiptist í fjögur lið sem berjast sín á milli þá er það ekki liðsskiptingin sem skiptir máli fyrir almenning. Raunveruleg liðskipting er á milli flokkanna og almennings. Þótt flokkarnir berjist um að vera í stjórnarforystu þá er það sameiginlegt markmið þeirra allra að smala búpeningnum, að halda þjóðinni í skefjum og að auka sinn eigin aðgang að fjármagni.

Núverandi ríkisstjórn vill þrengja að lýðræðinu með því að vega að forseta sem er fyrsti forsetinn í sögu lýðveldisins sem þorir að beita málskotsréttinum. Honum er hótað og ógnað úr ræðustóli á alþingi. 

Núverandi ríkisstjórn hefur hert á leyndinni yfir fjárframlögum (mútum) til stjórnmálamanna og stjórnmálaflokka.

Núverandi ríkisstjórn hefur viðhaldið kvótakerfi sem brýtur mannréttindi

Núverandi ríkisstjórn hefur barist fyrir því að festa í sessi þá hugmynd að skattgreiðendur beri ábyrgð á skuldum Björgólfs Thors

Í skjóli núverandi ríkisstjórnar svelta öryrkjar

Núverandi ríkisstjórn vinnur að því að viðhalda því fyrirkomulagi að gefa auðlindirnar til alþjóðafyrirtækja. 

Núverandi ríkisstjórn hefur unnið gegn margbreytileika í atvinnusköpun og styrkt þá ásýnd að þjóðin eigi allt undir byggingu álvera.

Fólkið sem skapar þetta ástand trúir því að í heiminum séu tvenns konar fólk. Kúgaðir og þeir sem kúga og berjast fyrir að vera í liði með þeim sem kúga til þess að lenda ekki í hinu liðinu. 

Samningsbrotamál líklegast